22 лістапада ў бібліятэцы ў рамках мерапрыемстваў віртуальнай чытальнай залы прайшоў семінар “Сусветнае мастацтва ў лічбе: электронныя рэсурсы для сучасных бібліятэк, музеяў і ўстаноў адукацыі”.
У семінары прынялі ўдзел больш за 70 чалавек – спецыялісты і карыстальнікі бібліятэк і інфармацыйных цэнтраў, навуковыя супрацоўнікі музеяў, выкладчыкі вышэйшых, сярэдніх і сярэдніх спецыяльных навучальных устаноў.
Адкрыла мерапрыемства Таццяна Кузьмініч, намеснік дырэктара Нацыянальнай бібліятэкі Беларусі па інфармацыйных рэсурсах.
Алег Маладзецкі, намеснік генеральнага дырэктара выдавецтва “Дырэкт-Медыя”, прадставіў развіццё асноўнага блока рэсурсаў электронна-бібліятэчнай сістэмы “Універсітэцкая бібліятэка анлайн” і прэзентаваў праект “Арт-Партал. Сусветная мастацкая культура”. Гэта якасны ілюстрацыйна-адукацыйны рэсурс, які прадстаўляе ў карыстанне больш за 70 000 рэпрадукцый мастацкіх твораў высокай якасці, інфармацыю пра больш чым 6 500 мастакоў і майстроў мастацтва, мастацтвазнаўчыя калекцыі музеяў свету, звесткі аб стылях і эпохах ў сусветным мастацтве. Алег Маладзецкі пазнаёміў удзельнікаў з кантэнтам рэсурсу, яго функцыянальнымі магчымасцямі і сэрвісамі, перспектывамі яго развіцця, таксама, распавёў пра магчымасць падключэння тэставага доступу і асаблівасці падпіскі на рэсурс у 2019 годзе з дапамогай віртуальнай чытальнай залы Нацыянальнай бібліятэкі Беларусі.
У дар Нацыянальнай бібліятэцы Беларусі былі перададзены кнігі па мастацтве выдавецтва “Дырэкт-Медыя”.
Прэзентацыя Алега Маладзецкага
Матэрыял падрыхтаваны аддзелам карпаратыўнага ўзаемадзеяння.
