1 снежня ў межах мерапрыемстваў віртуальнай чытальнай залы Нацыянальнай бібліятэкі Беларусі адбылася прэзентацыя ліцэнзійных электронных інфармацыйных рэсурсаў (ЭІР) і спецыяльных распрацовак для забеспячэння інфармацыйных патрэб людзей з паслабленым зрокам і невідушчых людзей.
Спецыялісты аддзела карпаратыўнага ўзаемадзеяння пазнаёмілі з аўдыякалекцыямі, а таксама метадычнай і вучэбнай літаратурай. Асаблівая ўвага была нададзена такому актуальнаму пытанню, як магчымасці выкарыстання ЭІР пры арганізацыі дыстанцыйнай адукацыі.
Віртуальная пляцоўка сабрала больш за 50 прадстаўнікоў устаноў вышэйшай адукацыі, каледжаў, ліцэяў, сярэдніх школ, публічных бібліятэк і грамадскіх арганізацый Беларусі.
Асаблівую цікавасць да мерапрыемства праявілі ўдзельнікі з Інстытута інклюзіўнай адукацыі Беларускага дзяржаўнага педагагічнага ўніверсітэта імя М. Танка, спецыялізаваных школ-інтэрнатаў для дзяцей з парушэннямі зроку і слыху, абласных грамадскіх арганізацый інвалідаў.
Віртуальная чытальная зала адкрыта для супрацоўніцтва з усімі бібліятэкамі і інфармацыйнымі цэнтрамі нашай краіны па пытаннях падпіскі на ліцэнзійныя базы даных і навучання працы з імі.
Запрашаем да партнёрства!
Матэрыял пададзены аддзелам карпаратыўнага ўзаемадзеяння.