5 мая ў Нацыянальнай бібліятэцы Беларусі пры падтрымцы выдавецтва Springer Nature адбыўся анлайн-семінар, прысвечаны развіццю ініцыятывы адкрытай навукі.
На мерапрыемстве з дакладам “Адкрыты доступ (Open Access) і экасістэма навуковай камунікацыі (місія выканальная)” выступіў загадчык сектара інавацыйнага развіцця бібліятэчна-інфармацыйных працэсаў Нацыянальнай бібліятэкі Беларусі Вячаслаў Брычкоўскі.
У выступленні былі разгледжаны пытанні лічбавай трансфармацыі навукова-адукацыйных працэсаў, выбару мадэлі арганізацыі доступу да навукова-адукацыйных рэсурсаў, выпрацоўка палітыкі адкрытага доступу да навуковых ведаў, прымянення сістэм інтэгрыраванага пошуку навуковай інфармацыі, кіравання наборамі адкрытых даследчых даных.
Менеджар па працы з кліентамі выдавецтва Springer Nature Дар’я Савельева расказала аб стратэгіі выдавецтва па развіцці ініцыятывы адкрытага доступу, рэалізацыі плана S, магчымасцях выкарыстання платформы Springer Nature для правядзення навуковых даследаванняў, пазнаёміла ўдзельнікаў семінара з тыповымі памылкамі аўтараў пры падачы рукапісаў навуковых артыкулаў у часопісы выдавецтва Springer Nature, праінфармавала аб працэдурах адмены аплаты за падрыхтоўку артыкулаў (APC) (APC – англ. article processing charges) пры публікацыі ў рэжыме адкрытага доступу.
У анлайн-семінары ўзялі ўдзел вучоныя НАН Беларусі, прадстаўнікі ўстаноў вышэйшай адукацыі нашай краіны і рэспубліканскіх навукова-практычных цэнтраў, супрацоўнікі бібліятэк Рэспублікі Беларусь.
Матэрыял пададзены аддзелам бібліятэчна-інфармацыйных тэхналогій.
