13 кастрычніка а 10-й гадзіне ў бібліятэцы пачне работу рэспубліканскі форум “Кніга = Свет: сучасны стан і стратэгіі развіцця нацыянальнай прасторы чытання”.
Арганізатарамі мерапрыемства выступаюць Нацыянальны інстытут адукацыі, Выдавецкі дом “Звязда”, Нацыянальная бібліятэка Беларусі, рэдакцыя “Настаўніцкай газеты” пры падтрымцы адміністрацыі Маскоўскага раёна г. Мінска, выдавецтва “Аверсэв”, прадстаўніцтва “Schneider Electric Industries SAS” (Францыя) ў Рэспубліцы Беларусь, прыватнага прадпрыемства “Гранд Райт”.
Форум стартуе ў межах рэспубліканскага інфармацыйна-асветніцкага праекта “Кніга = Свет” і закліканы стаць адным з важных крокаў па яго рэалізацыі. Інавацыйны паводле шляхоў і сродкаў ажыццяўлення праект “Кніга = Свет” мае на мэце стварэнне ўмоў для шматвектарнага развіцця культуры чытання беларускага грамадства.
Праблемнае поле форуму ўключае шэраг востра актуальных пазіцый, у ліку якіх: забеспячэнне ўстойлівага развіцця сацыякультурнай прасторы чытання; культура чытання як педагагічная праблема; “Аўтар – Твор – Чытач”: сучасная мастацкая літаратура як аб’ект чытацкага ўспрымання; праблемы і перспектывы развіцця беларускага кнігавыдання; найноўшыя ІКТ і інтэрнэт-рэсурсы як эфектыўныя інструменты інавацыйнага развіцця сацыякультурнай прасторы чытання.
У межах форуму мяркуецца пленарнае пасяджэнне, работа секцый і круглага стала, правядзенне майстар-класаў. Будзе працаваць выстаўка кніжнай прадукцыі.
Яскравай падзеяй форуму стане ўрачыстая цырымонія ўзнагароджання пераможцаў ІІ этапу культурна-інфармацыйнага марафону “Культ-пра-Свет” і дыстанцыйнага праекта “Стартап-фэст «Спадчына.tut»”.
Уваход на мерапрыемства – правы бакавы.
Тэлефон для даведак: (8 017) 293 27 56.
Е-mail: pr@nlb.by
