З 63 выбраных краін Рэспубліка Беларусь займае першае месца па колькасці бібліятэк на 1 млн жыхароў.
Гэта прадэманстравала Бібліятэчная карта свету, афіцыйна прадстаўленая 21 жніўня 2017 г. на Сусветным бібліятэчным і інфармацыйным кангрэсе ва Вроцлаве. На другім месцы – Францыя, за ёй ідуць Індыя, Чэхія і Літва.
Пры падрыхтоўцы Бібліятэчнай карты свету Міжнародная федэрацыя бібліятэчных асацыяцый і ўстаноў (IFLA) у 2017 годзе супрацоўнічала з нацыянальнымі бібліятэчнымі асацыяцыямі, нацыянальнымі бібліятэкамі і іншымі арганізацыямі. Удзельнікі праекта параўналі бібліятэчную статыстыку, якая існуе ў іх краінах і падалі дадзеныя па некаторых паказчыках дзейнасці бібліятэк.
Рэспубліка Беларусь з’явілася найбольш падрыхтаванай да стварэння карты, паколькі ў нашай краіне праводзяцца навуковыя даследаванні і створана фактаграфічная база даных “Бібліятэкі Рэспублікі Беларусь і замежных краін”. У ёй адлюстравана інфармацыя пра больш чым 7 тысяч бібліятэк розных міністэрстваў і ведамстваў нашай краіны (у тым ліку школьных, прафсаюзных, царкоўных і інш.), якая ўключае адрас, тэлефон, рэжым працы, кантактную інфармацыю кіраўнікоў, колькасныя паказчыкі фондаў, а таксама звесткі пра наяўныя ў бібліятэках электронныя інфармацыйныя рэсурсы.
Даныя пра бібліятэкі, сабраныя і прадстаўленыя IFLA, будуць выкарыстаны для садзейнічання свабоднаму доступу да інфармацыі і прыняцця мер, якія адпавядаюць Праграме ААН па ўстойлівым развіцці на 2030 год.
Першынства Рэспублікі Беларусь у рэйтынгу Міжнароднай федэрацыі бібліятэчных асацыяцый і ўстаноў не выпадковае. Яно абумоўлена сацыяльна арыентаванай палітыкай дзяржавы, накіраванай на захаванне і памнажэнне культурных і духоўна-маральных каштоўнасцей з улікам традыцый і нацыянальных асаблівасцей краіны, забеспячэнне максімальнай даступнасці для грамадзян якасных культурных даброт, умацаванне ўсебеларускай грамадзянскай самасвядомасці і духоўнай супольнасці беларускай нацыі, развіццё культурнай індустрыі.
Захаванне і развіццё аптымальнай сеткі традыцыйных культурных інстытутаў як аднаго з фактараў захавання духоўна-маральнага патэнцыялу нацыі – адзін з прыярытэтных напрамкаў дзейнасці ў сферы культуры, што замацавана ў Нацыянальнай стратэгіі ўстойлівага сацыяльна-эканамічнага развіцця Рэспублікі Беларусь на перыяд да 2030 года.