20 сакавіка 2009 года ў зале адукацыйных тэхналогій Нацыянальнай бібліятэкі Беларусі адбыўся рэспубліканскі навукова-практычны семінар “Рэдкая кніга: крытэрыі ідэнтыфікацыі”.
Мэтай семінара з’явілася абмеркаванне тэарэтычных і практычных пытанняў фарміравання фондаў рэдкай кнігі, а таксама павышэнне кваліфікацыі і абмен вопытам работы супрацоўнікаў аддзелаў рэдкіх кніг.
Мерапрыемства было арганізавана Нацыянальнай бібліятэкай Беларусі сумесна з Беларускай бібліятэчнай асацыяцыяй і Камітэтам па ахове кніжных помнікаў.
У семінары прынялі ўдзел спецыялісты бібліятэк, у тым ліку Нацыянальнай бібліятэкі Беларусі, супрацоўнікі музеяў і ВНУ, якія займаюцца даследаваннем, навуковай апрацоўкай, камплектаваннем і арганізацыяй фондаў рэдкай кнігі.
Старшынствавалі на семінары намеснік дырэктара Нацыянальнай бібліятэкі Беларусі па навуковай рабоце і сувязях з грамадскасцю Людміла Генадзьеўна Кірухіна і загадчык навукова-даследчага аддзела кнігазнаўства Нацыянальнай бібліятэкі Беларусі Галіна Уладзіміраўна Кірэева.
Работа семінара завяршылася экскурсіяй па музеі кнігі, у ходзе якой госці пазнаёміліся з калекцыяй рарытэтаў Нацыянальнай бібліятэкі Беларусі.