З 12 па 15 красавіка ў Харкаве прайшоў IV Міжнародны навукова-практычны семінар “Разнастайнасць культур: гісторыя і сацыяльна-камунікатыўная прырода кнігі”.
Семінар адбыўся ў Цэнтральнай навуковай бібліятэцы Харкаўскага нацыянальнага ўніверсітэта імя В.Н. Каразіна (Украіна).
Нацыянальная бібліятэка Беларусі была прадстаўленая дакладам Г.У. Кірэевай і Л.Г. Кірухінай “Навукова-даследчая дзейнасць Нацыянальнай бібліятэкі Беларусі ў галіне кнігазнаўства”.
Арганізатары семінара: Харкаўскі нацыянальны ўніверсітэт імя В.Н. Каразіна, Балтыйская міжнародная акадэмія (Латвія), Латвійская акадэмічная бібліятэка Латвійскага ўніверсітэта, Палтаўскі нацыянальны тэхнічны ўніверсітэт імя Ю. Кандрацюка.
Семінар быў прысвечаны кнізе як феномену ў гістарычным, філасофскім, культурным, сацыялагічным, бібліятэчным і выдавецкім вымярэнні. У семінары прымалі ўдзел прадстаўнікі Украіны, Польшчы, Латвіі, Сербіі і Беларусі.
У рамках семінара адбылося выязное пасяджэнне ў Палтаўскім універсітэце, дзе прайшла відэаканферэнцыя, на якой у рэжыме рэальнага часу былі заслуханы даклады супрацоўнікаў Балтыйскай міжнароднай акадэміі (г. Рыга) і Палтаўскага ўніверсітэта. Падчас відэаканферэнцый была прадстаўлена прэзентацыя "Полтавской серии" харкаўскага выдавецтва “Сага”.
На семінары адбылася сустрэча з расійскім бібліяфілам А. Венгеравым і прэзентацыя выдання “Библиохроника 1550–1975. В некотором царстве…”, прысвечанага яго асабістай калекцыі.