27 чэрвеня ў бібліятэцы адкрыецца выстаўка IV Міжнароднага пленэру тэкстыльнай скульптуры “Размовы ў зялёных”.
Выстаўка паспяхова падарожнічала цэлы год па лепшых музеях краіны. Свой трыумфальны тур на радзіме яна пачала ў мастацкім музеі фестывальнай сталіцы рэспублікі – Віцебску. Дасягнуўшы найвышэйшай кропкі, "Размовы ў зялёных" завяршаюць свой “тур” па краіне ў галерэі Нацыянальнай бібліятэкі Беларусі.
Экспазіцыя падрыхтавана аўтарскай некамерцыйнай канцэптуальнай галерэяй “БРАМА”, якая летась правяла ў Славакіі IV Міжнародны пленэр тэкстыльнай скульптуры. У праекце прынялі ўдзел беларускія мастакі тэкстылю – педагогі і выпускнікі мастацкіх факультэтаў і ВНУ нашай краіны, а таксама мастакі з Украіны, Славакіі, Расіі і іншых краін.
Скульптуры з лямца, стужак, карункаў выкананы ва ўсіх адценнях зялёнага колеру. Менавіта зялёны колер выбраны ў якасці сімвала свабоды, адкрытых магчымасцей для пошуку і эксперыменту. На экспазіцыі будуць прадстаўлены ўсе віды мастацкага тэкстылю, усе вядомыя тэхнікі работы з матэрыялам, самыя смелыя і нечаканыя іх спалучэнні, а таксама аўтарскія ноу-хау, якія выклікаюць ”выбух уяўлення”.
Мерапрыемства пачнецца а 17-й гадзіне ў галерэі “Лабірынт” (3-ці паверх).
Запрашаем наведаць выстаўку.
Тэлефоны для даведак: (8 017) 293 27 56, 293 28 33.
Е-mail: pr@nlb.by