12 верасня ў дзіцячым пакоі прайшло святочнае мерапрыемства “Разам з кнігай адкрываем свет”, прысвечанае Дню бібліятэк.
Дзеці пазнаёміліся з гісторыяй стварэння кнігі: ад наскальнага жывапісу да сучаснага кнігадрукавання. Прынялі ўдзел у рухавых гульнях і ў конкурсе загадак-пераваротак на тэму любімых казак. Навучылі Нязнайку з Кветкавага горада правільнаму стаўленню да кнігі. Юныя ўдзельнікі мерапрыемства змаглі пераўвасобіцца ў розных кніжных персанажаў. На памяць кожны зрабіў сабе яркага “вусеня” – закладку для чытання любімых кніг.
У завяршэнні свята хлопчыкі і дзяўчынкі сталі ўдзельнікамі казачнай экспедыцыі па бібліятэцы. Вывучыўшы чарадзейную карту “Кніжнай планеты”, дзеці адправіліся з “Краіны дзіцячых свят” па “Лесвіцы цішыні” да “Празрыстага астраўка”. Затым вандроўнікі перабраліся праз “Крыштальны масток” на “Востраў творчасці” з экспазіцыяй мастацкіх работ. Вяртаючыся з экспедыцыі, юныя ўдзельнікі наведалі “Шар жаданняў”.
Атрыманыя яркія і незабыўныя ўражанні ад свята дапоўніла ўручэнне ўсім удзельнікам падарункаў.
