2 красавіка па ініцыятыве Міністэрства замежных спраў Рэспублікі Беларусь на вонкавым электронным светлавым табло Нацыянальнай бібліятэкі Беларусі запушчана акцыя падтрымкі і салідарнасці нашай краіны з дзяржавамі, якія на сённяшні дзень найбольш пакутуюць ад заражэння COVID-19.
Графічны малюнак у падтрымку высілкаў у барацьбе з каранавірусам будзе размешчаны на будынку бібліятэкі да 8 красавіка. Ён утрымлівае сцягі ЗША, Італіі, Іспаніі, Кітая, Германіі, Францыі, Ірана, Вялікабрытаніі, Швейцарыі, Бельгіі, а таксама сцяг Беларусі ў знак салідарнасці і спагады. Выява суправаджаецца сімвалічным заклікам “Трымайцеся! Разам – мы пераможам!” на беларускай мове і дзяржаўных мовах згаданых краін.
У міністэрстве замежных спраў перакананы, што толькі сумесныя намаганні ўсёй міжнароднай супольнасці дапамогуць нам пераадолець гэты выклік. Салідарнасць і аб’яднаныя высілкі маюць асаблівую значнасць. І наш сімвалічны заклік “Трымайцеся! Разам – мы пераможам!” знойдзе водгук у сэрцах нашых суайчыннікаў і замежных партнёраў.
Матэрыял прадастаўлены аддзелам сувязей з грамадскасцю
