20 чэрвеня ў Нацыянальнай бібліятэцы прайшла цырымонія перадачы кнігі Вячаслава Бандарэнкі “Четыре судьбы. Одна Родина” ў дар раённым і гарадскім бібліятэкам.
Кніга “Четыре судьбы. Одна Родина” пісьменніка, гісторыка, журналіста Вячаслава Бандарэнкі – вялікі раман-эпапея, вялікае апавяданне пра лёсы некалькіх людзей і нават цэлых пакаленняў. Выданне прэтэндуе на званне не толькі самага аб'ёмнага, але і самага міжнароднага беларускага рамана: дзеянне адбываецца на працягу шасцідзесяці гадоў у дваццаці адной краіне.
Чатырох галоўных герояў, былых кадэтаў, пісьменнік кідае ў кругаварот гістарычных падзей – Першая сусветная, Грамадзянская вайна і Вялікая Айчынная... З энцыклапедычнай дакладнасцю аўтар апісвае кожную сітуацыю, момант, дэталь, з глыбокім веданнем справы падае замалёўкі з жыцця кадэцкага корпуса – форма, звычаі, статутныя правілы і пр.
На мерапрыемстве член Саюза пісьменнікаў Беларусі і Расіі, аўтар кнігі Вячаслаў Бандарэнка прэзентаваў выданне і падзяліўся з удзельнікамі цырымоніі гісторыяй яго стварэння. Аўтар працаваў над кнігай на працягу двух гадоў, наведваючы розныя краіны, таму шматлікія фрагменты, звязаныя з гэтымі паездкамі, спісаны, што называецца, з натуры. У працэсе стварэння рамана ён задзейнічаў велізарную колькасць крыніц – ад архіўных да апублікаваных. Раман багата ілюстраваны фотаздымкамі, якія дапамагаюць чытачу больш яскрава ўявіць людзей або падзеі, пра якія ідзе гаворка.
У ходзе цырымоніі Вячаслаў Бандарэнка ўручыў адну з кніг дырэктару Нацыянальнай бібліятэкі Беларусі Раману Матульскаму. Астатнія 200 экзэмпляраў у далейшым будуць перададзены ў гарадскія і раённыя бібліятэкі краіны.
Старшыня Рэспубліканскага савета Беларускага саюза сувораўцаў і кадэтаў Сяргей Жыціхін распавёў прысутным аб сумесным праекце “Четыре судьбы. Одна Родина” , які доўгі час існаваў у межах анлайн-прасторы на сайце грамадскага аб'яднання. Радуе той факт, што раман набыў новае жыццё, убачыўшы свет у выдавецтве “Аверсэв”, цяпер жа ідуць перамовы аб магчымасці экранізацыі твора.
У сваім выступленні Сяргей Жыціхін выказаў словы падзякі Раману Матульскаму за плённае супрацоўніцтва і ўрачыста ўручыў яму медаль “За вернасць кадэцкай справе”. Раман Сцяпанавіч падзякаваў за ўзнагароду і адзначыў, што падзяляе яе з усімі супрацоўнікамі бібліятэкі, якія займаюцца папулярызацыяй ваенна-патрыятычнай літаратуры.
У мерапрыемстве таксама прынялі ўдзел вядучы спецыяліст па сувязях з грамадскасцю выдавецтва “Аверсэв” Маргарыта Кацко, навучэнцы Мінскага сувораўскага ваеннага вучылішча, Спецыялізаванага ліцэя МУС Рэспублікі Беларусь і Мінскага гарадскога кадэцкага вучылішча.
