11 верасня ў Нацыянальным прэс-цэнтры адбылася прэс-канферэнцыя на тэму “Публічныя бібліятэкі: рудымент ці сучасныя інфармацыйныя цэнтры? Пошукі фармату, адэкватнага сённяшняму дню”.
У размове былі адзначаны тэндэнцыі ў развіцці бібліятэчнай сеткі, інфарматызацыі беларускіх бібліятэк, абнаўленні кніжных фондаў. Былі названыя актуальныя праблемы сферы, такія як размеркаванне фінансавання і абслугоўванне сельскіх населеных пунктаў.
Галоўная тэма сустрэчы – змяненне ролі бібліятэк у жыцці сучаснага грамадства. Так, першы намеснік дырэктара па абслугоўванні карыстальнікаў і ідэалогіі Нацыянальнай бібліятэкі Беларусі Алена Далгаполава выказала ідэю выкарыстання бібліятэкі ў якасці пляцоўкі для інтэлектуальнага правядзення вольнага часу і заклікала СМІ да супрацоўніцтва.
Спікерамі канферэнцыі сталі Сяргей Бацян – галоўны спецыяліст упраўлення культуры і народнай творчасці галоўнага ўпраўлення культуры і аналітычнай работы Міністэрства культуры Рэспублікі Беларусь, Іна Юрык – дырэктар Навуковай бібліятэкі Беларускага нацыянальнага тэхнічнага ўніверсітэта, старшыня Савета Беларускай бібліятэчнай асацыяцыі, Таццяна Швед – дырэктар Цэнтралізаванай сістэмы дзіцячых бібліятэк г . Мінска.
Штогод сталічныя дзіцячыя бібліятэкі наведваюць каля 120 тысяч мінчан. 75 % ад агульнай колькасці карыстальнікаў – чытачы да 15 гадоў. У цэлым па краіне бібліятэчная сістэма ахоплівае больш за 7 тысяч публічных і спецыяльных устаноў. Іх агульны аб’ём фонду ўключае каля 180 млн экзэмпляраў.
