У мэтах папулярызацыі беларуска-турэцкага супрацоўніцтва ў гуманітарнай сферы 18 снежня пры падтрымцы Пасольства Рэспублікі Беларусь у Турэцкай Рэспубліцы дырэктар Нацыянальнай бібліятэкі Беларусі Раман Матульскі наведаў Прэзідэнцкую бібліятэку Турцыі.
Прэзідэнцкая бібліятэка, афіцыйнае адкрыццё якой адбылося 20 кастрычніка, выбудавана ўнутры прэзідэнцкага комплексу, размешчанага ў раёне Бестэпе ў Анкары. Для шырокай публікі бібліятэка адчыніць дзверы ў 2020 годзе. Тут можна будзе знайсці кнігі не толькі пра культуру, навуку, мастацтва і філасофію Турцыі, але і асноўныя творы вядучых культур і цывілізацый свету. Бібліятэка стане своеасаблівым “акном” Турцыі ў свет.
Падчас сустрэчы з прэзідэнтам бібліятэкі Айханам Туглу Раман Матульскі расказаў аб кніжнай культуры нашай краіны і значнасці захавання культурных каштоўнасцей, пазнаёміў з выдавецкімі праектамі Нацыянальнай бібліятэкі Беларусі па факсімільным узнаўленні каштоўных кніжных помнікаў Беларусі. У якасці падарунка турэцкаму боку Раман Сцяпанавіч паднёс факсімільныя выданні “Кніжная спадчына Францыска Скарыны” і “Буквар”, а таксама копію фрагмента татарскага кітаба з фондаў Нацыянальнай бібліятэкі Беларусі.
Калекцыю бібліятэкі таксама папоўніў камплект кніг у рамках праекта “Беларусь сёння”. Прэзідэнцкая бібліятэка Турцыі стала 23-й установай, якая атрымала ў дар ад “алмаза ведаў” выданні, што найбольш поўна адлюстроўваюць сацыяльна-эканамічнае і палітычнае жыццё нашай краіны, яе шматвяковую гісторыю і культуру.
У гэты ж дзень Раман Матульскі наведаў Нацыянальную бібліятэку Турцыі. Узаемадзеянне дзвюх бібліятэк пачалося ў 2010 годзе з падпісання пагаднення аб супрацоўніцтве. У 2018 годзе з турэцкім бокам быў заключаны мемарандум аб узаемаразуменні, які адпавядае сучасным патрэбам дзвюх бібліятэк. Падчас сустрэчы з кіраўніком бібліятэкі Хамдзі Туршуджу былі абмеркаваны перспектывы развіцця супрацоўніцтва ў галіне бібліятэчнай справы, правядзення сумесных навуковых праектаў і даследаванняў.
Матэрыял прадастаўлены аддзелам сувязей з грамадскасцю.
Чытайце таксама пра візіт дырэктара Нацыянальнай бібліятэкі Беларусі Рамана Матульскага ў Стамбул