23 кастрычніка ў бібліятэцы прайшла прэзентацыя кнігі “Трасцянец. Трагедыя народаў Еўропы”.
У гісторыі беларускага народа ёсць падзеі, якія пакінулі ў памяці людзей страшныя раны. Трасцянец – найбуйнейшы на тэрыторыі Беларусі лагер смерці, адно з 8 самых буйных у Еўропе месцаў масавага знішчэння людзей у гады нямецка-фашысцкай акупацыі. Яго ахвярамі сталі 206,5 тысяч ваеннапалонных і мірных жыхароў з Аўстрыі, Германіі, СССР і іншых краін.
Падзеі тых гадоў – найвялікшая трагедыя, якую хочацца забыцца, але немагчыма не памятаць.
З 7 чэрвеня 2018 г. да 31 студзеня 2019 г. у бібліятэцы адкрыта інфармацыйна-дакументальная выстаўка “Лагер смерці Трасцянец. Гісторыя і памяць”.
Кніга “Трасцянец. Трагедыя народаў Еўропы” распавядае пра трагічныя падзеі, якія адбываліся ў 1941–1944 гадах каля вёскі Малы Трасцянец Мінскага раёна і заклікае аддаць даніну памяці ахвярам нацысцкай “фабрыкі смерці”. У выданні змяшчаюцца гістарычныя звесткі аб вёсках Малы і Вялікі Трасцянец, іх ваколіцах, апісанне Трасцянецкага мемарыяла. Чытачы ўбачаць шмат фатаграфій і рэдкіх дакументаў, у тым ліку спіс забітых гітлераўцамі жыхароў, знойдзены ў архіве Мінскай вобласці, а таксама нямецкую карту 1944 года, на якой паказаны вёска і суседнія населеныя пункты, размяшчэнне пабудоў. Фотаматэрыялы, якія выкарыстоўваліся пры стварэнні кнігі-мемарыяла, захоўваюцца ў фондах Беларускага дзяржаўнага музея гісторыі Вялікай Айчыннай вайны, Нацыянальнага гістарычнага архіва Беларусі, Дзяржаўнага архіва Мінскай вобласці. Акрамя таго, шэраг фатаграфіі прадаставіў вядомы беларускі фатограф Анатоль Дрыбас.
Кніга выйшла ў 2018 годзе ў выдавецтве “Беларуская Энцыклапедыя імя Петруся Броўкі” на беларускай, рускай і англійскай мовах. Яе аўтар – загадчыца аддзела навукова-даследчай работы Беларускага дзяржаўнага музея гісторыі Вялікай Айчыннай вайны Наталля Яцкевіч, рэдактар – вядучы навуковы рэдактар рэдакцыі гістарычных навук выдавецтва “Беларуская Энцыклапедыя імя Петруся Броўкі” Міхаіл Нікіцін.
У прэзентацыі прынялі ўдзел дырэктар выдавецтва “Беларуская Энцыклапедыя імя Петруся Броўкі” Уладзімір Андрыевіч, дырэктар Нацыянальнай бібліятэкі Беларусі Раман Матульскі, галоўны архітэктар творчай майстэрні Леаніда Левіна, адзін з аўтараў мемарыяла "Трасцянец" Галіна Левіна, галоўны рэдактар выдавецтва "Беларуская Энцыклапедыя імя Петруся Броўкі" Ларыса Языковіч, а таксама навуковыя дзеячы, прадстаўнікі Выдавецкага дома “Звязда”, Беларускага дзяржаўнага музея Вялікай Айчыннай вайны.
Глядзіце пра прэзентацыю кнігі рэпартаж Белтэлерадыёкампаніі і відэасюжэт АНТ, а таксама наш фотарэпартаж:
