21 верасня ў зале адукацыйных тэхналогій адбылася прэзентацыя відэапраграмы Рафаэля Зарка і Уладзіміра Лявона пра сувязь архітэктуры, помнікаў і скульптуры.
У рамках прэзентацыі прайшоў паказ відэафільма Рафаэля Зарка “Rhombus Sectus” пра будынак Нацыянальнай бібліятэкі Беларусі.
Год таму французская здымачная група на чале з Рафаэлем Зарка, маладым французскім мастаком, наведала горад Мінск для таго, каб зняць відэаарт пра Нацыянальную бібліятэку Беларусі. Сёлета Рафаэль Зарка вярнуўся ў Мінск, каб паказаць відэаарт беларускаму гледачу. Акрамя фільма «Rhombus Sectus», госці мерапрыемства ўбачылі праграму, складзеную з фрагментаў фільмаў, якія тлумачаць адносіны скульптара Рафаэля Зарка да «карцінкі, якая рухаецца». Французскі рэжысёр і прадзюсер Уладзімір Лявон, які працуе зараз над фільмам пра Рафаэля Зарка, таксама ўзяў удзел у гэтай праграме.
У ходзе прэзентацыі французскія дзеячы мастацтваў расказалі пра ход здымкак, пра свае творчыя планы, падзяліліся ўражаннямі, якія яны атрымалі ад Беларусі падчас знаходжання ў нашай краіне.
У мерапрыемстве бралі ўдзел намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Людміла Кірухіна, Надзвычайны і Паўнамоцны Пасол Французскай Рэспублікі ў Рэспубліцы Беларусь Мішэль Рэнеры, саветнік па супрацоўніцтве і культуры Пасольства Французскай Рэспублікі ў Рэспубліцы Беларусь Людовік Руае, супрацоўнікі Нацыянальнай бібліятэкі Беларусі, архітэктар, аўтар праекта Нацыянальнай бібліятэкі Беларусі Віктар Крамарэнка.
 |
 |
 |
 |
