12 верасня а 16-й гадзіне ў галерэі “Лабірынт” адбудзецца прэзентацыя серыі кніг Анатоля Бутэвіча “Сем цудаў Беларусі”, вылучаных на атрыманне Дзяржаўнай прэміі Беларусі.
Мерапрыемства прысвечана Году кнігі.
Літаратурна-мастацкія выданні серыі “Сем цудаў Беларусі” зроблены на дакументальнай аснове. Дакладныя звесткі пра выдатныя помнікі архітэктуры, духоўныя здабыткі продкаў, знакавыя гістарычныя постаці, унітаваныя ў агульнаеўрапейскі кантэкст беларускія з'явы і падзеі прадстаўлены ў выглядзе пазнавальных і цікавых аповедаў. Захапляльныя тэксты Анатоля Бутэвіча суправаджаюцца цудоўнымі ілюстрацыямі вядомага мастака Паўла Татарнікава.
Анатоль Іванавіч – аўтар кніг для дзяцей, кніг гістарычнай прозы, у тым ліку рамана “Каралева не здраджвала каралю”, кнігі “Таямніцы Мірскага замка, або Падарожжа па сівых мурах з Адамам Міцкевічам”. Ён таксама перакладае на рускую мову творы беларускіх аўтараў, на беларускую – творы англійскіх, украінскіх, польскіх, рускіх пісьменнікаў. У яго перакладзе выйшлі творы Станіслава Лема, у тым ліку раманы “Салярыс” і “Непераможны”, Элізы Ажэшкі, Рышарда Курыльчыка.
Тэлефоны для даведак: (8 017) 293 28 02; (8 017) 293 27 61; (8 017) 293 27 64; (8 017) 293 27 67.
E-mail: pr@nlb.by