6 лютага на XXI Мінскай міжнароднай кніжнай выстаўцы-кірмашы адбылася прэзентацыя новых электронных выданняў Нацыянальнай бібліятэкі Беларусі – “Памятные книжки Гродненской губернии (1847–1915)” і “Юзаф Ігнацый Крашэўскі (1812–1887)”.
Мультымедыйнае выданне “Памятные книжки Гродненской губернии (1847–1915)” – чарговы, чацвёрты па ліку кампакт-дыск, падрыхтаваны Нацыянальнай бібліятэкай Беларусі ў рамках праекта па электронным узнаўленні памятных кніжак тых губерняў Расійскай імперыі, аснову якіх складалі беларускія землі. Яно з’яўляецца працягам аналагічных электронных выданняў, прысвечаных памятным кніжкам Віцебскай, Мінскай і Магілёўскай губерняў.
Электроннае выданне “Юзаф Ігнацый Крашэўскі (1812–1887)” (DVD на 2-х дысках) з’яўляецца вынікам рэалізацыі міжнароднага праекта па віртуальнай рэканструкцыі спадчыны Ю.І. Крашэўскага, пісьменніка, гісторыка, публіцыста, мастака, кампазітара, выдаўца, жыццё і творчасць якога звязаны з многімі краінамі, у тым ліку з Беларуссю, Польшчай і Украінай. У рэалізацыі праекта прынялі ўдзел Брэсцкая абласная бібліятэка імя М. Горкага (ініцыятар праекта), Нацыянальная бібліятэка Беларусі, Музей Ю.І. Крашэўскага ў Раманаве (Польшча), Бяла-Падляская гарадская публічная бібліятэка (Польшча) і Ровенская абласная ўніверсальная навуковая бібліятэка (Украіна). Праект рэалізаваны пры падтрымцы Нацыянальнай камісіі Рэспублікі Беларусь па справах ЮНЕСКА.
На першым дыску прадстаўлены найбагацейшы бібліяграфічны рэпертуар, музычныя і мастацкія творы, манаграфія аб Ю.І. Крашэўскім, хроніка яго жыцця і творчасці. На другім – электронныя аналагі твораў на польскай мове, таксама ў перакладах на беларускую, рускую і ўкраінскую мовы. Выданне мае чатырохмоўны інтэрфейс: на беларускай, польскай, рускай і ўкраінскай мовах прадстаўлены ўсе асноўныя элементы структуры, а таксама матэрыялы даведачна-метадычнага характару (уводзіны, анатацыі, хроніка жыцця і творчасці Ю.І. Крашэўскага). Асноўная частка тэкстаў даецца на мове арыгінала рукапісу або выдання.
У прэзентацыі выданняў прынялі ўдзел намеснік дырэктара па інфармацыйных рэсурсах Нацыянальнай бібліятэкі Беларусі Т.В. Кузьмініч, загадчыца НДА бібліяграфіі І.У. Градоўкіна, загадчыца інфармацыйна-аналітычнага аддзела Л.В. Гарбачова, намеснік дырэктара па навуковай рабоце Брэсцкай абласной бібліятэкі імя М. Горкага А.М. Мяснянкіна, экс-старшыня Нацыянальнай камісіі Рэспублікі Беларусь па справах ЮНЕСКА, пісьменнік У.Г. Шчасны, літаратуразнавец і перакладчык твораў Ю.І. Крашэўскага на беларускую мову М.П. Кенька.