8 лютага ў рамках XХ Мінскай міжнароднай кніжнай выстаўкі-кірмашу адбылася прэзентацыя сумесных навукова-выдавецкіх праектаў Нацыянальнай бібліятэкі Беларусі і Белінвестбанка.
На працягу трох гадоў цеснага ўзаемадзеяння бібліятэкай і банкам быў рэалізаваны цэлы шэраг яркіх праектаў. Самым прадстаўнічым з іх з’яўляецца выпуск трох камплектаў календароў пад агульнай назвай “Памятаем пра мінулае, рухаючыся ў будучыню”.
Камплект календароў на 2013 г. прадстаўляе ўсю гісторыю беларускай дзяржаўнасці і культуры праз ключавыя помнікі айчыннага пісьменства – надпісы на Барысавых камянях і Крыжы Еўфрасінні Полацкай, словы летапісаў і хронік, прававых актаў і мастацкіх твораў, патрыятычных газет і рэвалюцыйных лістовак, рукапісных і друкаваных кніг.
Пад час прэзентацыі намеснік дырэктара Нацыянальнай бібліятэкі Беларусі Аляксандр Суша правёў з гледачамі віктарыну. Тыя, хто адказаў на пытанні, атрымалі ў падарунак камплект календароў “Памятаем пра мінулае, рухаючыся ў будучыню”.
Рэалізаваны праект сведчыць аб поспехах дзяржаўна-прыватнага партнёрства. Зробленая праца з’яўляецца толькі пачаткам у справе ўмацавання беларускай культуры і стане асновай для рэалізацыі новых пачынанняў.
Чытайце таксама: