15 лютага ў музеі кнігі ў рамках святкавання 20-годдзя ўстанаўлення дыпламатычных адносін паміж Беларуссю і Азербайджанам адбылася прэзентацыя мініяцюрнага выдання зборніка Янкі Купалы “Жалейка”.
Арганізатарамі мерапрыемства выступілі Пасольства Рэспублікі Беларусь у Азербайджанскай Рэспубліцы і Нацыянальная бібліятэка Беларусі.
Вершаваны двухтомнік беларускага класіка Янкі Купалы “Жалейка” выйшаў у свет у год 130-годдзя паэта у выдавецтве Indigo (Азербайджан, г. Баку). Стваральнікам гэтага высокамастацкага зборніка з’яўляецца старшыня рэспубліканскага таварыства “Кніга”, дырэктар Музея мініяцюрных кніг г. Баку Зарыфа Салахава.
Надрукаваны дзякуючы фінансавай падтрымцы міжнароднага грамадскага аб’яднання “Кангрэс азербайджанскіх абшчын Беларусі” і пры садзейнічанні Нацыянальнай бібліятэкі Беларусі, якая прадаставіла факсімільную копію арыгінальнага тэксту твора, двухтомнік “Жалейка” з’яўляецца мініяцюрным узнаўленнем арыгінальнага выдання 1908 года. Сёлета зборніку Янкі Купалы спаўняецца 105 гадоў.
Фармат выдання – 35 на 47 міліметраў. У першым томе 63 вершы размешчаны на 282 старонках, а ў другім – 35 вершаў на 288 старонках.
“Жалейка” выйшла тыражом у 50 экзэмпляраў. Першыя экзэмпляры гэтых унікальных мініяцюрных кніжак перададзены ў дар Прэзідэнту Азербайджанскай Рэспублікі Ільхаму Аліеву, а таксама адпраўлены з суправаджальным лістом галоўнага арганізатара выпуску Зарыфы Салахавай Прэзідэнту Рэспублікі Беларусь Аляксандру Лукашэнку.
На прэзентацыі выдання выступілі дырэктар музея мініяцюрных кніг г. Баку Зарыфа Салахава, дырэктар Нацыянальнай бібліятэкі Беларусі Раман Матульскі, дырэктар выдавецтва “Беларуская Энцыклапедыя імя П. Броўкі” Таццяна Бялова, дырэктар Дзяржаўнага літаратурнага музея Янкі Купалы Алена Ляшковіч.
У цёплай і сяброўскай атмасферы спадарыня Салахава перадала ў фонд бібліятэкі ўнікальны мініяцюрны зборнік “Жалейка”.
У канцы мерапрыемства Надзвычайны і Паўнамоцны Пасол Рэспублікі Куба ў Беларусі Альфрэда Ньевес Партуонда, дырэктар Нацыянальнай бібліятэкі Беларусі Раман Матульскі і ўсе жадаючыя пакінулі памятныя запісы ў кнізе водгукаў спадарыні Салахавай.
|
|
|
|
|
|
|
|
|
|
|
