16 чэрвеня ў Маскве адкрылася фотавыстаўка “Нацыянальная бібліятэка Беларусі” і адбылася прэзентацыя ўнікальнага факсімільнага выдання “Кніжная спадчына Францыска Скарыны”.
Абедзве падзеі прайшлі ў новым, знакавым для краіны Дзелавым і культурным комплексе Пасольства Рэспублікі Беларусь у Расійскай Федэрацыі.
Сучасны выдатна абсталяваны комплекс закліканы стаць эфектыўнай пляцоўкай для папулярызацыі беларускай культуры, навукі і духоўнай спадчыны, развіцця за мяжой беларускага бізнесу, прэзентацыі эканамічных магчымасцей і інвестыцыйнага патэнцыялу Рэспублікі Беларусь.
Фотавыстаўка “Нацыянальная бібліятэка Беларусі” прадставіла дзелавым, грамадскім і навуковым кругам Расіі, творчай інтэлігенцыі і шырокай аўдыторыі галоўную бібліятэку Беларусі як значную з’яву культуры, маштабны шматфункцыянальны комплекс, у якім сумясціліся высокія тэхналогіі і лепшыя традыцыі, ультрасучасны дызайн і безумоўны камфорт. Арыгінальны будынак, адкрыты ў 2006 годзе, выкананы ў выглядзе каштоўнага каменю – дыямента, які сімвалізуе цэннасць ведаў, што захоўваюцца ў бібліятэцы. Гэта “візітная картка” Беларусі. Дзякуючы незвычайнаму архітэктурнаму рашэнню беларускі “дыямент” не раз апынаўся ў рэйтынгах самых дзівосных, незвычайных будынкаў свету.
Фотавыстаўка прадставіць гледачу галоўную бібліятэку Беларусі ў лепшых, а часам і зусім нечаканых ракурсах на 25 здымках. Шэсць вядомых беларускіх фотамастакоў стварылі гэтую калекцыю – Анатоль Дрыбас, Аляксандр Жарнасек, Лолій Македонскі, Сяргей Плыткевіч, Віктар Суглоб і Валерый Харчанка. Раней выстаўка “Нацыянальная бібліятэка Беларусі” экспанавалася ў Францыі, Вялікабрытаніі, Нідэрландах, Германіі, Швейцарыі, Італіі, Аўстрыі, Венгрыі, Чэхіі, Польшчы, Латвіі, Літве, Эстоніі і Швецыі.
У Дзелавым і культурным комплексе Пасольства Рэспублікі Беларусь у Расійскай Федэрацыі былі таксама прэзентаваны пяць першых узноўленых тамоў з поўнага збору работ Францыска Скарыны, беларуса, які паклаў пачатак кнігадрукаванню ва Усходняй Еўропе. Выпуск факсімільнага выдання ўсіх 25 кніг, надрукаваных Францыскам Скарынам у Празе (1517–1519) і Вільні (1522–1525), – унікальны культурны праект Нацыянальнай бібліятэкі Беларусі і ААТ "Банк БелВЭБ", завяршыць які плануецца да 2017 года.
Факсімільнае выданне з максімальнай паўнатой узнаўляе кнігі Францыска Скарыны: захаваны асаблівасці шрыфтоў і гравюр арыгінальных выданняў, перададзены ўсе штрыхі, набытыя на працягу 500-гадовага існавання.
У аснове калекцыі – электронныя копіі кніг беларускага першадрукара, якія найбольш захаваліся і знаходзяцца ў бібліятэках і музеях Беларусі, Расіі, Украіны, Германіі і іншых краін.
Перавыдадзеныя шэдэўры суправаджаюцца ўпершыню ажыццёўленымі перакладамі прадмоў і пасляслоўяў Францыска Скарыны на сучасныя беларускую, рускую і англійскую мовы.
Дырэктар Нацыянальнай бібліятэкі Беларусі Раман Матульскі ўручыў унікальныя экзэмпляры пасольству Беларусі ў Расіі і найбуйнейшым расійскім інфармацыйным цэнтрам: Расійскай дзяржаўнай бібліятэцы, Усерасійскай дзяржаўнай бібліятэцы замежнай літаратуры імя І.І. Рудаміна, Навуковай бібліятэцы Маскоўскага дзяржаўнага ўніверсітэта імя М.В. Ламаносава, Дзяржаўнай публічнай гістарычнай бібліятэцы Расіі, Інфармацыйна-бібліятэчнаму цэнтру Маскоўскага дзяржаўнага інстытута культуры, а таксама Дзяржаўнаму гістарычнаму музею і Расійскаму дзяржаўнаму архіву старажытных актаў.
Тэлефон для даведак: (8 017) 293 27 56.
E-mail: pr@nlb.by
 |
 |
 |
 |
 |
 |
 |
 |
 |
 |
 |
 |
