27 мая ў бібліятэцы адбылася прэзентацыя манаграфіі Алены Шацько “Колокола и колокольные звоны православных храмов западных регионов Беларуси: история и современность”, прысвечаная 1025-годдзю Хрышчэння Русі.
Адкрыў мерапрыемства духоўнік брацтва званароў Беларускай праваслаўнай царквы протаіерэй Алег Шульгін, які адзначыў неацэнны ўклад аўтара ў вывучэнне і захаванне шматвяковай гісторыі царкоўнага звону на Беларусі.
Алена Шацько ў сваім выступленні расказала пра гісторыю напісання манаграфіі, наведванне звыш 200 храмаў заходніх рэгіёнаў Беларусі, дзе гутарыла з вернікамі, званарамі, духавенствам, апісвала званы і фіксавала гучанне звонаў. Асноўнай мэтай было данесці да сучаснікаў і зафіксаваць для будучых пакаленняў часцінку звонавага мастацтва Беларусі, захаваць традыцыі сельскіх званароў, адраджаць іх і прымнажаць. У прэзентацыі таксама прынялі ўдзел кандыдат багаслоўскіх навук, загадчык кафедры біблеістыкі і хрысціянскага веравучэння Інстытута тэалогіі імя свв. Мяфодзія і Кірыла Беларускага дзяржаўнага ўніверсітэта протаіерэй Сергій Гардун, старшыня Беларускага саюза музычных дзеячаў, народны артыст, лаўрэат Дзяржаўнай прэміі Рэспублікі Беларусь і прэміі “За духоўнае адраджэнне” Міхаіл Дрынеўскі, мастацтвазнавец, член трох беларускіх прафесійных саюзаў – мастакоў, дызайнераў і кінематаграфістаў – Таццяна Бембель.
У музычнай частцы прэзентацыі прагучалі царкоўныя песнапенні ў выкананні маладзёжнага хору “Виссон” пад кіраўніцтвам магістра мастацтвазнаўства Алёны Высоцкай і дзіцячага хору 8-й музычнай школы мастацтваў, якім кіруе Ірына Разанава.
 |
 |
 |
 |
 |
 |
 |
 |
 |
