1 чэрвеня ў НББ ў рамках Дзён культуры Швецыі ў Беларусі (13 мая – 12 чэрвеня 2010 г.) адбылася прэзентацыя манаграфіі Андрэя Катлярчука “У ценю Польшчы і Расеі. Вялікае княства Літоўскае і Швэцыя ў часе эўрапейскага крызісу сярэдзіны XVII ст.”.
Гэтае мерапрыемства з’яўляецца сумесным праектам Пасольства Швецыі ў Рэспубліцы Беларусь і Нацыянальнай бібліятэкі Беларусі.
Манаграфія “У ценю Польшчы і Расеі. Вялікае княства Літоўскае і Швэцыя ў часе эўрапейскага крызісу сярэдзіны ХVІІ ст.” – беларускае выданне дысертацыі доктара гітарычных навук, журналіста, даследчыка Андрэя Катлярчука. Асобнай кнігай па-беларуску яна выходзіць упершыню. У манаграфіі знайшлі адлюстраванне спробы Вялікага княства Літоўскага заключыць дзяржаўную унію са Швецыяй. Багата ілюстраваная кніга выйшла ў свет пры падтрымцы Згуртавання беларусаў свету “Бацькаўшчына” і Пасольства Швецыі ў Рэспубліцы Беларусь.
Адкрыла мерапрыемства намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Людміла Кірухіна. На прэзентацыі выступілі Надзвычайны і Паўнамоцны Пасол Каралеўства Швецыя ў Рэспубліцы Беларусь Стэфан Эрыксан, аўтар манаграфіі, вучоныя-гісторыкі Інстытута гісторыі Нацыянальнай акадэміі навук Беларусі. Андрэй Катлярчук адказаў на пытанні прысутных і пасля мерапрыемства правёў аўтограф-сесію.
 |
 |
 |
