3 снежня ў бібліятэцы адбылася прэзентацыя кнігі “Светлый мир Натальи Бажановой”.
Кніга адкрывае серыю “Российские ученые-международники”, якая распавядае пра жыццё і творчасць расійскіх навукоўцаў, якія ўнеслі ўклад у вывучэнне сусветнай палітыкі і эканомікі, міжнародных адносін, міжнароднага права, цывілізацый, культур, этнасаў.
Выданне выпушчана ў дзвюх кнігах і ўтрымлівае шматлікія дакументы і матэрыялы па навуковай, публіцыстычнай, педагагічнай, грамадска-палітычнай дзейнасці Наталлі Бажанавай, поўны пералік навуковых публікацый, рэцэнзіі і водгукі на яе працы, адрасаваныя ёй лісты, успаміны калег і сяброў, спачуванні. Кніга ілюстравана фотаздымкамі, у тым ліку з сямейнага архіва Бажанавых.
Наталля Бажанава была доктарам эканамічных навук, членам шэрагу міжнародных акадэмій, галоўным навуковым супрацоўнікам Інстытута ўсходазнаўства Расійскай акадэміі навук, расійскім палітолагам, гісторыкам, публіцыстам, педагогам, дыпламатам.
Н. Бажанава – аўтар звыш двух дзясяткаў навуковых манаграфій, прысвечаных праблемам розных краін і рэгіёнаў. Пяру Бажанавай належыць таксама больш за 400 артыкулаў у навуковай і агульнай перыёдыцы Расіі, Кітая, ЗША, Японіі, Паўднёвай Карэі, Германіі, Вялікабрытаніі, Аўстрыі, Італіі, Аўстраліі, Новай Зеландыі, Тайваня, Сірыі, Ірана, Іспаніі, Югаславіі, Ізраіля і іншых дзяржаў. Некаторыя з прац удастоены міжнародных прэмій.
Падчас прэзентацыі кнігі “Светлый мир Натальи Бажановой” былі перададзены ў дар Нацыянальнай бібліятэцы.
Арганізатары мерапрыемства – Нацыянальная бібліятэка Беларусі і Аналітычны цэнтр EcooM.