14 чэрвеня ў галерэі “Лабірынт” адбылася прэзентацыя кнігі Алеся Карлюкевіча “І марам волю дам: літаратурная карта Пухавіччыны”.
Арганізатары мерапрыемства – выдавецтва “Беларуская Энцыклапедыя імя П. Броўкі”, Нацыянальная бібліятэка Беларусі.
Выданне ўяўляе сабой літаратурна-краязнаўчае даследаванне, якое падрабязна знаёміць з гісторыяй аднаго з рэгіёнаў Міншчыны – Пухавіцкага раёна. Менавіта на Пухавіччыне з’явіліся такія літаратурныя дзеячы, як Міхась Чарот, Аляксандр Ельскі і многія іншыя. Аўтар запрашае чытача ў падарожжа па літаратурных мясцінах свайго роднага рэгіёна.
У прэзентацыі ўзялі ўдзел дырэктар выдавецтва “Беларуская Энцыклапедыя імя П. Броўкі” Таццяна Бялова; дырэктар Нацыянальнай бібліятэкі Беларусі Раман Матульскі; галоўны рэдактар РВУ “Літаратура і Мастацтва”, пісьменнік, публіцыст Алесь Карлюкевіч; начальнік аддзела навуковага выкарыстання дакументаў і інфармацыі Дэпартамента па архівах і справаводстве Міністэрства юстыцыі Рэспублікі Беларусь Уладзімір Крук; галоўны рэдактар выдавецтва “Беларуская Энцыклапедыя імя П. Броўкі” Ларыса Языковіч; галоўны рэдактар часопіса “Полымя” Мікола Мятліцкі; пісьменнік, гісторык, член Саюза пісьменнікаў Беларусі Наталля Голубева і інш.
У рамках мерапрыемства дырэктар выдавецтва “Беларуская Энцыклапедыя імя П. Броўкі” Таццяна Бялова і аўтар кнігі Алесь Карлюкевіч перадалі ў дар Нацыянальнай бібліятэцы Беларусі кнігу “І марам волю дам: літаратурная карта Пухавіччыны” з аўтографам пісьменніка.