29 красавіка адбылася прэзентацыя і перадача ў дар Нацыянальнай бібліятэцы Беларусі шматтомнага выдання першакрыніц Acta Nuntiaturae polonae ад Пасольства Рэспублікі Польшча ў Рэспубліцы Беларусь.
Выданне змяшчае архіўныя матэрыялы, якія датычацца карэспандэнцыі апостальскіх нунцыяў у Польшчы.
Мерапрыемства, якое прайшло ў Нацыянальнай бібліятэцы Беларусі, адкрыў яе дырэктар Р.С. Матульскі. У прэзентацыі бралі ўдзел дырэктар Польскага інстытута ў Мінску Пётр Казакевіч; адзін з сааўтараў выдання, прафесар, член Польскай акадэміі навук Тэрэза Хінчэўска-Генель; жонка Надзвычайнага і Паўнамоцнага Пасла Рэспублікі Польшча ў Рэспубліцы Беларусь пані Ганна Літвіна; галоўны навуковы супрацоўнік Інстытута гісторыі Нацыянальнай акадэміі навук Беларусі, доктар гістарычных навук Георгій Галенчанка.
Acta Nuntiaturae polonae – дакументы пастаяннага прадстаўніцтва Ватыкана ў Рэчы Паспалітай XVI–XVIII стагоддзяў, а таксама перыяду існавання II Рэчы Паспалітай. Яны з’яўляюцца бясцэннай і ўнікальнай крыніцай інфармацыі для гісторыкаў. Выданне расказвае пра гісторыю касцёлаў, рэлігій і веравызнанняў, закранае гісторыю краіны, двара і грамадскага жыцця. Інтарэс прадстаўляюць таксама захапляльныя апісанні архітэктуры, прыроды і звычаяў.
Дзякуючы гэтай выдавецкай серыі чытачы маюць магчымасць больш шырокага вывучэння сумеснай гісторыі Польшчы, Беларусі, Украіны і Літвы.