17 кастрычніка а 15-й гадзіне ў галерэі “Лабірынт” (3-ці паверх) адбудзецца прэзентацыя “Баркалабаўскі летапіс: з мінулага ў будучае”.
Прэзентацыя прадставіць шырокай грамадскасці факсімільнае выданне ўнікальнага помніка беларускага летапісання – знакамітага Баркалабаўскага летапісу.
У выніку плённай працы прадстаўнікоў Нацыянальнай бібліятэкі Беларусі, выдавецтва “Беларуская Энцыклапедыя імя Петруся Броўкі”, Нацыянальнай акадэміі навук Беларусі, Федэральнай нацыянальна-культурнай аўтаноміі “Беларусы Расіі” і Магілёўскага абласнога выканаўчага камітэта ўпершыню зроблена спроба апублікавання летапісу ў поўным аб’ёме, у якім ён захаваўся да нашага часу. Факсімільнае выданне ўяўляе сабой камплект з дзвюх кніг, якія ўключаюць факсімільнае ўзнаўленне ўнікальнага беларускага летапісу, транслітэраваны тэкст рукапіснага помніка і матэрыялы яго гісторыка-культурнага даследавання.
Факсіміле дазволіла максімальна аўтэнтычна ўзнавіць знешні выгляд і арыгінальную структуру кніжнага помніка, вярнуць яго ў культурную прастору Беларусі. На прэзентацыі будуць прысутнічаць непасрэдныя стваральнікі факсімільнага выдання. Цікавы вопыт удзельнікаў праекта будзе ўпершыню прадстаўлены шырокай грамадскасці.
Баркалабаўскі летапіс з’яўляецца каштоўнейшым помнікам беларускай культуры, адным з найбольш поўных і насычаных звесткамі летапісных зводаў, што распавядаюць пра мінулае нашага краю і беларускага народа. Яго факсімільнае выданне будзе карысным для даследчыкаў айчыннай гісторыі, кніжнай культуры, беларускай мовы, рэлігіі, а таксама для тых, хто цікавіцца беларускай кніжнай спадчынай.
