7 лютага альбом “Напалеон Орда” быў прэзентаваны ў Сёмкава. У аграсядзібе “Даліна Утульнасць” адбылося мерапрыемства, прымеркаванае да дня нараджэння мастакоў Напалеона Орды і Юзафа Пешкі.
З прэзентацыяй альбома “Напалеон Орда” выступіў яго складальнік і аўтар уступнага артыкула Аляксандр Суша, намеснік генеральнага дырэктара Нацыянальнай бібліятэкі Беларусі, дырэктар па навуковай рабоце і выдавецкай дзейнасці.
Аляксандр Суша распавёў, што Нацыянальная бібліятэка Беларусі валодае найвялікшай калекцыяй гравюр Напалеона Орды ў нашай краіне. Калекцыя літаграфій адлюстроўвае беларускія краявіды Гродзенскай, Віленскай, Віцебскай, Мінскай і Магілёўскай губерняў, а таксама выявы, выкананыя за мяжой: у Польшчы, Украіне, Літве, Латвіі і Румыніі. Гравюры былі створаны на літаграфічным прадпрыемстве Максіміліяна Фаянса ў 1873–1883 гадах.
Упершыню ў альбоме сабраны і прадстаўлены 190 гравюр з фондаў Нацыянальнай бібліятэкі. Вобразы роднага краю, зафіксаваныя Напалеонам Ордай паўтара стагоддзі таму, застаюцца адной з найбольш каштоўных візуальных крыніц па айчыннай гісторыі.
Матэрыял падрыхтаваны навукова-даследчым аддзелам кнігазнаўства.