10 красавіка ў Нацыянальнай бібліятэцы Беларусі адбылася прэзентацыя выдання “Беларусы ў фотаздымках Ісака Сербава. 1911–1912”.
Арганізатары мерапрыемства – выдавецтва “Беларуская Энцыклапедыя імя Петруся Броўкі” і Нацыянальная бібліятэка Беларусі.
Альбом “Беларусы ў фотаздымках Ісака Сербава. 1911–1912” – новае выданне з серыі “Энцыклапедыя рарытэтаў” выдавецтва “Беларуская Энцыклапедыя імя Петруся Броўкіі”.
Аснову альбома складаюць здымкі беларускага этнографа Язэпа Абрамавіча Сербава, якія былі зроблены вучоным пад час экспедыцыі па тэрыторыі Беларусі ў 1911–1912 гадах, што праводзілася па заданні паўночна-заходняга аддзела Імператарскага рускага геаграфічнага таварыства. Да ўвагі чытачоў прадстаўлены 442 унікальныя фотаздымкі, якія адлюстроўваюць традыцыйную культуру гісторыка-этнаграфічных рэгіёнаў Заходняга і Усходняга Палесся і паўночна-ўсходняй часткі Цэнтральнай Беларусі.
На мерапрыемстве выступілі дырэктар Нацыянальнай бібліятэкі Беларусі Раман Матульскі; дырэктар дэпартамента па архівах і справаводстве Міністэрства юстыцыі Рэспублікі Беларусь Уладзімір Адамушка; старшы бібліятэкар аддзела рукапісаў Бібліятэкі Вільнюскага ўніверсітэта Валянціна Карпава; кандыдат мастацтвазнаўства, дацэнт кафедры этналогіі і фальклору Беларускага дзяржаўнага ўніверсітэта культуры і мастацтваў, складальнік, аўтар уступнага артыкула і каментарыяў да альбома Вольга Лабачэўская; галоўны рэдактар выдавецтва “Беларуская Энцыклапедыя імя Петруся Броўкі” Ларыса Языковіч.
Нацыянальная бібліятэка Беларусі атрымала ў дар ад выдавецтва “Беларуская Энцыклапедыя імя Петруся Броўкі” экзэмпляр альбома “Беларусы ў фотаздымках Ісака Сербава. 1911–1912”.
 |
 |
 |
 |
 |
 |
 |
 |
 |
