27 жніўня ў Нацыянальнай бібліятэцы Беларусі адбылася прэс-канферэнцыя, прысвечаная перавыданню Тураўскага Евангелля.
Тураўскае Евангелле, напісанае ў XI стагоддзі, з’яўляецца самым старажытным помнікам кніжнай культуры, створаным на тэрыторыі сучаснай Рэспублікі Беларусь. Рукапіс быў знойдзены ў 1865 годзе ў Тураве і з тых часоў знаходзіцца на пастаянным захоўванні ў Бібліятэцы Акадэміі навук Літвы імя Урублеўскіх (г. Вільнюс). Помнік уяўляе сабой Евангелле з дадатковымі запісамі, два з якіх былі зроблены ў пачатку XVI стагоддзя ад імя князёў Астрожскіх.
– Напярэдадні Дня ведаў, Дня беларускага пісьменства і Дня бібліятэк кампанія Xerox і Нацыянальная бібліятэка Беларусі падрыхтавалі выдатны падарунак шырокаму кругу даследчыкаў, навучэнцаў і аматараў гісторыі – факсімільнае перавыданне рукапісу Тураўскага Евангелля, – адзначыў пад час адкрыцця прэс-канферэнцыі дырэктар Нацыянальнай бібліятэкі Беларусі Раман Матульскі. – Місіяй нашай бібліятэкі з’яўляецца вяртанне кніжнай спадчыны Беларусі праз факсімільнае перавыданне помнікаў, якія захаваліся: першым было перавыдадзена Слуцкае Евангелле і зусім нядаўна – Полацкае Евангелле.
– У Беларусі захавалася зусім нямнога гістарычных помнікаў. Тураўскае Евангелле з’яўляецца ўнікальным культурным помнікам нароўні з Нясвіжскім і Мірскім замкамі, – каменціруе значную падзею Аляксандр Швец, кіраўнік прадстаўніцтва кампаніі Xerox у Рэспубліцы Беларусь. – Мы спадзяёмся, што рэалізацыя праекта дапаможа большай колькасці суайчыннікаў пазнаёміцца з гэтым рэдкім помнікам пісьменства, які складае неад’емную частку нашай культурнай і гістарычнай спадчыны.
Аляксандр Суша, намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі, адказны рэдактар факсімільнага выдання адзначыў, што кніга была падрыхтавана з захаваннем усіх асаблівасцей арыгінала, у суправаджэнні гістарычных і кнігазнаўчых даследаванняў на беларускай, рускай і англійскай мовах, дзякуючы чаму з духоўным багаццем Беларусі зможа пазнаёміцца і сусветная супольнасць.
Старэйшы навуковы супрацоўнік Інстытута гісторыі НАН Беларусі, аўтар даследавання аб гісторыі Тураўскай зямлі, Пётр Лысенка расказаў, што Тураўскае Евангелле было напісана такім жа шрыфтом, што і Астрамірава Евангелле – найстаражытнейшы рукапіс сярэдзіны XI стагоддзя, створаны на Русі. Гэты факт сведчыць пра тое, што ствараліся рукапісы адначасова, а культура Русі і Беларусі была на адным, высокім, узроўні.
Святар Аляксей Хацееў, член выдавецкага савета Беларускай праваслаўнай царквы, перадаў прысутным блаславенне і вітальнае слова Патрыяршага Экзарха ўсяе Беларусі, Мітрапаліта Мінскага і Слуцкага Паўла, падкрэсліўшы, што захаванне духоўнай спадчыны, перавыданне Тураўскага Евангелля, – вялікая падзея для народа Беларусі.
Факсімільныя копіі помніка славянскага пісьменства былі надрукаваны тыражом 500 экзэмпляраў з выкарыстаннем найноўшых тэхналогій. Іх плануецца перадаць бібліятэкам, вышэйшым і сярэднім навучальным установам, айчынным і замежным установам навукі, культуры і адукацыі.
Перавыданне Тураўскага Евангелля стала працягам доўгатэрміновага праекта кампаніі Xerox і Нацыянальнай бібліятэкі Беларусі па ўзнаўленні беларускіх помнікаў пісьменства і азнаямленні з імі шырокай грамадскасці. У рамках гэтага праекта ў 2012 г. быў выдадзены віленскі "Буквар" 1767 г. – самы ранні беларускі буквар з тых, што захаваліся. У далейшым мяркуецца прадоўжыць рэалізацыю падобных праектаў і выпусціць факсімільныя копіі іншых унікальных помнікаў кніжнай культуры.
|
|
|
|
|
|
