27 кастрычніка ў Нацыянальнай бібліятэцы Беларусі адбудзецца пасяджэнне Міжнароднага савета па развіцці праекта “Віртуальная рэканструкцыя бібліятэкі роду Сапег”.
Міжнародны савет па развіцці праекта задуманы як міжнародны калегіяльны орган, прызначаны для каардынацыі дзейнасці розных устаноў замежных краін па вывучэнні, бібліяграфічнай рэканструкцыі і аблічбоўцы дакументальнай спадчыны роду Сапег. На пасяджэнні савета плануецца абмеркаванне праекта “Віртуальная рэканструкцыя бібліятэкі роду Сапег”, які рэалізуецца сумеснымі намаганнямі Нацыянальнай бібліятэкі Беларусі (Мінск) і Расійскай нацыянальнай бібліятэкі (Санкт-Пецярбург) пры фінансавай падтрымцы Бюро ЮНЕСКА ў Маскве, абмен інфармацыяй пра месцазнаходжанне і ступень даследаванасці кніжных збораў роду, а таксама вызначэнне перспектыў пашырэння саставу ўдзельнікаў і наступнага развіцця дадзенага праекта на рэгіянальным і міжнародным узроўнях.
У рабоце савета возьмуць удзел 15 экспертаў з Беларусі, Расіі, Польшчы і Літвы – вядучыя спецыялісты бібліятэк і архіваў, якія займаюцца вывучэннем дакументальных калекцый роду Сапег, а таксама прадстаўнікі Міністэрствы культуры Рэспублікі Беларусь і Нацыянальнай камісіі Рэспублікі Беларусь па справах ЮНЕСКА.
Вынікі работы пасяджэння Міжнароднага савета па развіцці праекта “Віртуальная рэканструкцыя бібліятэкі роду Сапег” і прынятыя рашэнні будуць спрыяць наступнаму ўмацаванню супрацоўніцтва і больш цеснай каардынацыі дзейнасці ўстаноў культуры, навукі і адукацыі ў галіне выяўлення, апісання, аблічбоўкі і публікацыі дакументальнай спадчыны роду Сапег, якая з’яўляецца здабыткам некалькіх сучасных дзяржаў, бесперашкоднаму абмену данымі з мэтай фармавання адзінай інфармацыйнай прасторы.
Удзельнікам пасяджэння будзе прапанавана культурная праграма, у рамках якой пройдуць экскурсіі па Нацыянальнай бібліятэцы Беларусі.
Тэлефоны для даведак: 293-27-81, 293-26-11, 293-27-67.
E-mail: pr@nlb.by
