Праект “У госці да кніг” адзначае сваё пяцігоддзе! У студзені 2016 г. у Нацыянальнай бібліятэцы стартаваў праект для дзяцей, скіраваны на развіццё цікавасці да гісторыі кнігі і папулярызацыю нацыянальнай кніжнай спадчыны.
Заняткі адбываюцца ў музеі кнігі, які стаў для юных кнігазнаўцаў актыўнай прасторай для дыялогу, гульняў і творчасці. За пяць гадоў дзейнасці адбылося шмат падзей праекта. Спецыялісты музейнай педагогікі дасягнулі значных поспехаў і стварылі цікавыя наватарскія напрацоўкі.
Выдзяляем 5 паспяховых вынікаў праекта “У госці да кніг”:
1. Дзеткі любяць прыходзіць у музей кнігі.
Адным з важных крытэрыяў эфектыўнасці праекта з’яўляецца “ўцягванне” дзяцей у жыццё музея, каб яны не абмяжоўваліся разавым наведаннем, а зацікаўлена вярталіся зноў і зноў. Прыцягальнасць заняткаў заключаецца ў магчымасці вывучэння кніжнай культуры сярод арыгінальных кніжных помнікаў, якія экспануюцца ў музеі, у непасрэдным кантакце з артэфактамі і ў магчымасці асабістага назірання і ўдзелу. Атрыманню ведаў спрыяюць незвычайная музейная атмасфера, сяброўскія ўзаемаадносіны, дзе кожнае дзіця выяўляе сябе свабодна і ў той жа час усе захоплены агульнай справай.
2. Распрацавана методыка арганізацыі заняткаў.
У межах праекта распрацавана ўнікальная методыка арганізацыі заняткаў па тэматыцы кніжнай культуры. Метады арыентаваны на стварэнне магчымасцей для камунікацыі, адукацыйнага развіцця і рэалізацыі творчага патэнцыялу дзетак. У рамках праекта была створана праграма, якая складаецца з серый заняткаў: “Клуб кніжных прафесараў”, “Урокі ў музеі”, “Музейныя чытанні”. Важным вынікам стаў выхад навукова-папулярнай кнігі па гісторыі кніжнай культуры для дзяцей. Методыка дазваляе актыўна спазнаваць інфармацыю па гісторыі кнігі і спрыяе росту цікавасці да навучання. У перыяд пандэміі COVID-19 кліентам было прапанавана дыстанцыйнае навучанне, якое не замяніла рэальныя сустрэчы, але дазволіла падтрымаць кантакт са сталымі наведвальнікамі і прыцягнула ўвагу новых кліентаў да музея кнігі і кніжнай культуры.
3. Прыцягненне дзеячаў беларускай культуры да праекта.
Праект стаў больш цікавы і яркі дзякуючы творчым сустрэчам і ўдзелу знакамітых дзеячаў культуры, звязаных з кнігай. На заняткі запрашаліся даследчыкі кнігі, мастакі, пісьменнікі, музыкі, якія дзяліліся сваімі ведамі, творчасцю і любоўю да кнігі.
4. Удзел у сумежных рэспубліканскіх і міжнародных праектах.
Праект “У госці да кніг” далучаецца да шматлікіх праектаў рэспубліканскага і міжнароднага ўзроўню, што таксама спрыяе яго развіццю. Так, заняткі адбываліся на пляцоўках Мінскай міжнароднай кніжнай выставы-кірмашу, у рамках дзён беларускага пісьменства, рэспубліканскіх тыдняў дзіцячай і юнацкай кнігі, фестывалю “Горад і кнігі”, акцыі “Бібліяноч” і інш. Унікальным досведам стала правядзенне заняткаў ў межах выставачных праектаў Нацыянальнай бібліятэкі: “Францыск Скарына і яго эпоха”, “Беларусь і Біблія”, “Буквар”, “Берасцейская Біблія” і інш.
5. Запатрабаванасць праекта ў прафесійнай сферы.
Тэарэтычныя распрацоўкі і практычны досвед актыўна выкарыстоўваецца ў бібліятэчнай, музейнай і адукацыйнай сферах. Вынікі праекта і напрацоўкі былі прадстаўлены на дзясятках навуковых канферэнцыях і навукова-практычных семінарах, на старонках навуковых і навукова-метадычных выданняў. У шматлікіх бібліятэках краіны былі арганізаваны заняткі для дзетак, лекцыі і майстар-класы для спецыялістаў.
Віншуем усіх удзельнікаў і сяброў праекта з першым юбілеем і дзякуем за супрацоўніцтва!
Калі вы яшчэ не былі на музейных занятках у бібліятэцы, то шчыра запрашаем!
Матэрыял падрыхтаваны навукова-даследчым аддзелам кнігазнаўства.
