12 чэрвеня ў прэс-цэнтры Дома прэсы прайшла прэс-канферэнцыя па выніках XVI Міжнароднага конкурсу “Мастацтва кнігі” дзяржаў – удзельніц СНД, які адбыўся 30–31 мая ў г. Баку.
На XVI Міжнародны конкурс “Мастацтва кнігі” дзяржаў – удзельніц СНД паступіла больш за 80 выданняў з 7 краін: Рэспублікі Беларусь, Азербайджанскай Рэспублікі, Рэспублікі Казахстан, Рэспублікі Таджыкістан, Кыргызскай Рэспублікі, Расійскай Федэрацыі, Туркменістана.
Праект Нацыянальнай бібліятэкі Беларусі – “Першы Буквар: факсімільнае ўзнаўленне: да 400-годдзя выдання” – быў высока ацэнены кампетэнтным журы і адзначаны дыпломам “Жамчужына культурнай спадчыны”.
Сёлета беларускія выдаўцы сабралі цэлую калекцыю ўзнагарод конкурсу “Мастацтва кнігі”. У 11 разгледзеных намінацыях кнігі, прадстаўленыя Рэспублікай Беларусь, занялі 8 першых месцаў, 1 другое месца і 1 трэцяе месца. Акрамя гэтага, 9 кніг удастоены спецыяльных дыпломаў конкурсу.
