26 мая адбудзецца прэзентацыя новага электроннага рэсурсу “Мода і час”, адкрыццё фота- і кніжнай выставак, паказы калекцый дарослага і дзіцячага адзення маладых беларускіх дызайнераў.
Электронная калекцыя “Мода і час” створана Нацыянальнай бібліятэкай Беларусі. Яна змяшчае каля 400 матэрыялаў – лічбавыя копіі кніг, часопісаў, паштовак, фатаграфій, відэазапісаў, якія адлюстроўваюць тэндэнцыі моды з XVI стагоддзя да нашых дзён. Рэсурс будзе размешчаны ў свабодным доступе на інтэрнэт-партале бібліятэкі.
Некаторыя ўнікальныя выданні з фондаў Нацыянальнай бібліятэкі Беларусі, копіі якіх размешчаны ў электронным зборы “Мода і час”, будуць прадстаўлены на выстаўцы ў рамках прэзентацыі рэсурсу.
Паказы дарослага і дзіцячага адзення з калекцый маладых дызайнераў Інстытута сучасных ведаў імя А.М. Шырокава і яркае дэфіле ў сучасных беларускіх “вышыванках” майстэрні “Elen Carotte” правядзе Нацыянальная школа прыгажосці.
Звыш 100 фатаграфій гараджан у свецкіх і ваенных гарнітурах пачатку ХХ стагоддзя з прыватнай калекцыі доктара гістарычных навук Аляксандра Леанідавіча Самовіча ўпрыгожаць і дапоўняць калекцыю. Фатаграфіі, зробленыя ў фотастудыях беларускіх гарадоў, адлюстроўваюць мужчынскую, жаночую, дзіцячую моду той эпохі.
Праект будзе цікавым усім, хто сочыць за тэндэнцыямі моды, стварае свой стыль адзення, жадае больш даведацца пра дзівосны свет моды і прыгажосці.
Арганізатарам мерапрыемства выступіла Нацыянальная бібліятэка Беларусі пры ўдзеле Інстытута сучасных ведаў імя А.М. Шырокава і Нацыянальнай школы прыгажосці.
Мерапрыемства пачнецца а 17-й гадзіне ў атрыуме другога паверха бібліятэкі.
Кантактная асоба: Пшыбытка Віктар Вікенцьевіч.
Тэлефон: (8 017) 266 37 51.
E-mail: v_pshibytko@nlb.by
