Да 300-годдзя Саламеі Русецкай Нацыянальная бібліятэка Беларусі распрацавала і прадстаўляе вашай увазе віртуальны праект “Адысея Саламеі Русецкай: ад Стамбула да Пецярбурга”. Юбілей нашай зямлячкі ўключаны ў Спіс памятных дат ЮНЕСКА на 2018 год.
Саламея Рэгіна Русецкая (у замужжы Пільштынова) – першая ў гісторыі Рэчы Паспалітай жанчына-лекарка, нястомная вандроўніца, мемуарыстка. Яна працавала пры расійскім і аўстрыйскім імператарскіх дварах, а таксама гарэме турэцкага султана.
Праект уяўляе сабой віртуальную вандроўку па гарадах і краінах, дзе падарожнічала Саламея Русецкая. Гэта Стамбул, Вена, Нясвіж, Санкт-Пецярбург, Кіеў, Рыга і іншыя. Вы даведаецеся пра жыццё і традыцыі жыхароў Асманскай Імперыі, інтрыгі расійскага двара ў час праўлення імператрыцы Ганны Іаанаўны, зможаце акунуцца ў прыгоды нашай гераіні, адчуць подых таго часу.
Праект заснаваны на мемуарах Саламеі Русецкай, той спадчыне, якая пасля яе засталася. Гэта кніга-дзённік з квяцістай назвай “Рэха, на свет пададзенае, заняткаў, падарожжа і жыцця майго авантураў…”. Арыгінал яе мемуараў “Echo na świat podane procederu podróży i życia mego awantur…” знаходзіцца ў Музеі князёў Чартарыйскіх у Кракаве. У Беларусі кніга выйшла ў перакладзе Міколы Хаўстовіча пад назвай “Авантуры майго жыцця”.
Яе мемуары – крыніца па гісторыі і геаграфіі, дзе аўтарка перадала свае ўспаміны і ўласныя разважанні наконт тагачасных падзей, адлюстравала цікавыя вобразы людзей, што сустракаліся ў час яе падарожжаў па краінах Захаду і Усходу. Шмат месца ў кнізе адведзена апісанню побыту і нораваў розных народаў, выкладзены метады лячэння розных хвароб. Лекарка шмат у чым абапіралася на здабыткі народнай медыцыны, папулярызавала гігіену і здаровы лад жыцця.
Асобная частка праекта прысвечана ўвасабленню асобы Саламеі ў культурнай прасторы Беларусі: на тэатральных падмостках, у беларускай літаратуры і выяўленчым мастацтве.Запрашаем усіх да знаёмства з праектам.
