У Год малой радзімы віртуальная чытальная зала Нацыянальнай бібліятэкі Беларусі працягвае знаёміць з краязнаўчымі рэсурсамі, размешчанымі ў раздзеле “Электронныя рэсурсы арганізацый-партнёраў”.
Паважаныя сябры! Сёння мы віртуальна прадстаўляем шматаспектную базу даных “Вайна. Памяць. Пошук”, створаную пошукава-даследчым краязнаўчым цэнтрам Цэнтралізаванай бібліятэчнай сістэмы Асіповіцкага раёна Магілёўскай вобласці.
Осталась память о войне,
Она живёт в тебе и мне,
О тех, кто жив, кто воевал,
И тех, кто без вести пропал!
Марк Львоўскі.
Тэма Вялікай Айчыннай вайны шчымлівай струной і болем адгукаецца ў душы кожнага беларуса. Вайна катком прайшлася па многіх сем’ях, сёлах, гарадах, разбурыўшы супакой і шчасце некалькіх пакаленняў. У кожным сяле ці раёне ёсць памятныя мясціны, звязаныя з трагічнымі і гераічнымі падзеямі тых часоў, узведзены помнікі. Аматары гісторыі збіраюць успаміны, лісты і іншыя дакументальныя сведчанні. Гэта тым больш каштоўна, што непасрэдных удзельнікаў тых падзей становіцца з кожным годам усё менш, і кожная крупінка іх аповеду, захаваная сучаснікамі, стане сувязным звяном з будучымі пакаленнямі жыхароў краю, краіны, ды і не толькі Беларусі.
Прыкладам беражлівых адносін да памяці пра вайну служаць шматлікія рэсурсы, створаныя супрацоўнікамі бібліятэк Беларусі, якія дазваляюць віртуальна стаць бліжэй да падзей і выпрабаванняў, што выпалі на долю старэйшага пакалення. Адзін з такіх рэсурсаў – праект “Вайна. Памяць. Пошук” Асіповіцкай ЦБС. У ім сабрана інфармацыя па некалькіх напрамках: аднаўленне ходу баявых дзеянняў на гэтай тэрыторыі, папаўненне і ўдакладненне спісаў загінуўшых і вярнуўшыхся з фронту воінаў, размяшчэнне успамінаў, лістоў з фронту, сямейных хронік. База даных дапамагае знайсці інфармацыю аб загінуўшых сваяках, звесткі пра якіх яшчэ не ўнесены ў кніжнае выданне “Памяць”.
З віртуальнай чытальнай залы можна перайсці не толькі на гэты, але і на многія іншыя цікавыя рэсурсы. Наша віртуальная пляцоўка гатова змясціць спасылкі і на новыя базы даных – чакаем вашых прапаноў!
Матэрыял прадастаўлены аддзелам карпаратыўнага ўзаемадзеяння.
