1 верасня – заўсёды хвалюючае свята для вучняў, іх бацькоў і настаўнікаў. У гэты дзень дзеці пасля працяглых летніх канікул вяртаюцца ў класы і зноў бяруцца “грызці граніт навукі”.
Але не для ўсіх першы ўрок у гэтым годзе прайшоў за школьнай партай. Асабліва гэты дзень запомніцца тым, хто правёў яго ў галоўнай бібліятэцы краіны.
Першы ўрок “Мая Радзіма – Беларусь” для вучняў гімназіі № 1 імя Ф. Скарыны г. Мінска прайшоў у зале адукацыйных тэхналогій. Дзецям распавялі пра вядомых беларусаў, а таксама аб спартыўных дасягненнях краіны. Яны больш даведаліся пра прыродныя багацці радзімы, вядомыя на ўвесь свет айчынныя прадпрыемствы, архітэктурныя помнікі і іншыя славутасці рэспублікі. У канцы школьнікаў чакала віктарына па пройдзенай тэме.
Прыемным працягам урока стала наведванне агляднай пляцоўкі. Юныя госці “алмаза ведаў” убачылі Мінск з вышыні птушынага палёту, а пазней – з пляцоўкі ля галоўнага ўваходу ў бібліятэку – запусцілі шарыкі ў блакітнае вераснёўскае неба.
Матэрыял прадастаўлены аддзелам сувязей з грамадскасцю.
