26 чэрвеня ў Нацыянальнай бібліятэцы Інданезіі адбылася цырымонія дарэння факсіміле “Кніжная спадчына Францыска Скарыны”.
Шматтомнае выданне, якое прадстаўляе гісторыю і культурную спадчыну беларускага народа, перадаў дырэктару Нацыянальнай бібліятэкі Інданезіі Мухамаду Шарыфу Банда пасол Рэспублікі Беларусь у Рэспубліцы Інданезія Валерый Калеснік.
Кіраўнік Нацыянальнай бібліятэкі Інданезіі падзякаваў за каштоўны падарунак, а таксама выказаў зацікаўленасць ва ўсталяванні супрацоўніцтва з Нацыянальнай бібліятэкай Беларусі і візіце ў Рэспубліку Беларусь.
За апошнія гады ўнікальнае выданне “Кніжная спадчына Францыска Скарыны”, якое выпушчана Нацыянальнай бібліятэкай Беларусі і Банкам БелВЭБ да 500-годдзя беларускага кнігадрукавання, было перададзена ў многія найбуйнейшыя бібліятэкі і інфармацыйныя цэнтры як у Беларусі, так і далёка за яе межамі. Шматтомнік стаў своеасаблівым культурным сімвалам і візітнай карткай краіны, дазваляючы жыхарам далёкіх дзяржаў пазнаваць і адкрываць для сябе культурную, самабытную і дружалюбную Беларусь.
