12 лістапада ў рамках Нацыянальнага інфармацыйна-бібліятэчнага тыдня “Infolib Uzbekistan – 2021”, які праходзіць у Ташкенце, і ў памяць аб 80-й гадавіне пачатку Вялікай Айчыннай вайны адбылося адкрыццё інфармацыйна-ілюстрацыйнага праекта “Лясная песня”, падрыхтаванага Нацыянальнай бібліятэкай Беларусі і Нацыянальным архівам Рэспублікі Беларусь.
Праект закліканы данесці да шырокай аўдыторыі сведчанні бяспрыкладнага подзвігу савецкага народа і сілы духу партызан. Экспазіцыя выбудавана на 10 банэрах і дае магчымасць дакрануцца да гісторыі беларускага партызанскага руху праз дакументы таго часу: лістоўкі, агітплакаты, газеты, фатаграфіі, сюжэтныя замалёўкі, урыўкі з апавяданняў, вершаў і песень.
З прывітальнымі словамі да ўдзельнікаў мерапрыемства звярнуліся Надзвычайны і Паўнамоцны Пасол Рэспублікі Беларусь у Рэспубліцы Узбекістан Леанід Марыніч і дырэктар Нацыянальнай бібліятэкі Узбекістана імя Алішэра Наваі Уміда Ташабаева.
Саветнік-пасланнік пасольства Беларусі Аляксандр Салаўёў прадставіў мультымедыйную прэзентацыю і расказаў пра гераічны ўклад узбекскага народа ў вызваленне Беларусі ад нямецка-фашысцкіх захопнікаў.
У мерапрыемстве ўзялі ўдзел прадстаўнікі грамадскасці і сродкаў масавай інфармацыі.
Матэрыял пададзены аддзелам сувязей з грамадскасцю.
