2–3 верасня ў рамках Дня беларускага пісьменства ў Полацку адбудзецца “Фестываль кнігі і прэсы” – імправізаваны гарадок, дзе будзе шырока прадстаўлена гісторыя і сучаснасць беларускай кнігі.
На дзіцячай пляцоўцы фестывалю сваю праграму “Пазітыў ад Скарыны” для жыхароў і гасцей свята прадставіць Нацыянальная бібліятэка Беларусі.
Свята ў Полацку пройдзе пад знакам адметных для гісторыі Беларусі падзей: 500-годдзя беларускага кнiгадрукавання i 1155-годдзя Полацка. З горадам на Заходняй Дзвіне звязана біяграфія Францыска Скарыны. Постаць беларускага першадрукара стане цэнтральнай у святочнай праграме “Пазітыў ад Скарыны”. Праграма будзе ўключаць заняткі для дзяцей і іх бацькоў, якія праводзяцца ў даступнай і займальнай форме, напоўненая творчымі заданнямі, гульнямі і добрым настроем.
Францыск Скарына з’яўляецца адной з самых яркіх постацей беларускай культуры. Несумнеўна, што ён быў чалавекам, поўным аптымізму, наватарства, жыццялюбства, энергіі і пазітыву! Спазнаваць Скарыну – цікавая і нянудная справа. Пераканацца ў гэтым можна на занятках “Пазітыў ад Скарыны” ў Полацку!
Месца правядзення:
г. Полацк, Фэстываль кнігі і прэсы, дзіцячая пляцоўка.
Час правядзення:
2 верасня: 12.00–14.00, 17.00–19.00.
3 верасня: 16.30–18.00.
