19 мая ў Нацыянальнай бібліятэцы Беларусі адбыліся пасяджэнні Савета кіраўнікоў урадаў СНД, Міждзяржсавета ЕўрАзЭС на ўзроўні кіраўнікоў урадаў і Міждзяржсавета ЕўрАзЭС (вышэйшага органа Мытнага саюза) на ўзроўні кіраўнікоў урадаў.
Падчас пасяджэнняў Савета кіраўнікоў урадаў Садружнасці Незалежных Дзяржаў разглядаліся пытанні, якія датычацца праекта Дагавора аб зоне свабоднага гандлю, праекта Міждзяржаўнай праграмы інавацыйнага супрацоўніцтва дзяржаў – удзельніц СНД на перыяд да 2020 года, мерапрыемстваў па правядзенні ў 2011-м Года павышэння харчовай бяспекі ў СНД. Бакі разгледзелі ход падрыхтоўкі міждзяржаўнай выстаўкі, прысвечанай 20-годдзю СНД, пытанні супрацоўніцтва дзяржаў у галіне мірнага атама, а таксама ў сферы культуры, мастацтва, адукацыі і навукі.
На пасяджэнні Міждзяржаўнага савета ЕўрАзЭС кіраўнікі ўрадаў абмеркавалі работу Мытнага саюза і фарміраванне Адзінай эканамічнай прасторы. Асаблівая ўвага была нададзена выкананню мерапрыемстваў плана сумесных мер па пераадоленні наступстваў сусветнага фінансавага крызісу. Акрамя гэтага, прэм'ер-міністры разгледзелі арганізацыйныя аспекты стварэння суда ЕўрАзЭС – прававога механізму для вырашэння спрэчак у рамках ЕўрАзЭС і Мытнага саюза.
Па выніках пасяджэнняў падпісаны шэраг дамоў і пагадненняў.