З 10 па 13 лістапада ў Стамбуле (Турэцкая Рэспубліка) прайшлі пасяджэнні генеральнай асамблеі асацыяцыі EIFL (Electronic information for libraries).
У яе рабоце ўзялі ўдзел прадстаўнікі больш за 40 дзяржаў. Рэспубліку Беларусь прадстаўляў супрацоўнік Нацыянальнай бібліятэкі Беларусі, загадчык сектара падтрымкі сістэмы інфармацыйнага забеспячэння інавацыйнай дзейнасці В.І. Брычкоўскі, які выступіў з інфармацыйным паведамленнем “Стварэнне і выкарыстанне навукова-адукацыйных рэсурсаў адкрытага доступу ў Рэспубліцы Беларусь”.
На пасяджэннях абмяркоўваўся шырокі круг пытанняў, звязаных з павышэннем эфектыўнасці выкарыстання электронных інфармацыйных рэсурсаў у навукова-адукацыйнай сферы. Вялікая ўвага была нададзена развіццю ініцыятывы адкрытага доступу (Open Access, ОА). Прайшлі спецыялізаваныя сесіі па ОА і электронных кнігах.
У рамках работы круглых сталоў былі вынесены на абмеркаванне такія пытанні, як выкарыстанне інавацыйных тэхналогій у бібліятэках (Massive Open Online Courses, Open Research Data, Text and data mining) і захаванне аўтарскіх праў пры рабоце з электроннымі рэсурсамі.
У дні правядзення генеральнай асамблеі была арганізавана выстаўка інфармацыйных рэсурсаў, на якой былі прадстаўлены прадукты вядучых замежных выдаўцоў: Project Muse, EBSCO, Cambridge University Press, Oxford University Press, Emerald, Gale/Cengage, IOP, JSTOR, Royal Society, Publishing, Taylor & Francis, Wiley-Blackwell, SAGE, Credо, Nature, OECD.
У рамках правядзення перагавораў з вытворцамі інфармацыйных рэсурсаў была дасягнута дамоўленасць аб арганізацыі тэставага доступу да электронных інфармацыйных рэсурсаў Project Muse, Gale/Cengage, IOP, JSTOR, Royal Society, Publising,Taylor & Francis, Wiley-Blackwell, SAGE, Credо, Nature, OECD для Нацыянальнай бібліятэкі Беларусі і арганізацый, якія ўваходзяць у Савет бібліятэк Беларусі па інфармацыйным узаемадзеянні, з мэтай далейшай закупкі ліцэнзій на найбольш запатрабаваныя інфармацыйныя рэсурсы.