18 сакавіка 2009 года ў Нацыянальнай бібліятэцы Беларусі прайшла сустрэча міністра эканомікі Рэспублікі Беларусь М.П. Зайчанкі з міністрам эканомікі Рэспублікі Арменія Н.Г. Ерыцянам.
Сустрэча адбылася ў адпаведнасці з праграмай знаходжання ў Рэспубліцы Беларусь урадавай дэлегацыі Рэспублікі Арменія.
У рамках візіту армянскай дэлегацыі ў Круглай зале Нацыянальнай бібліятэкі Беларусі прайшло чарговае пасяджэнне Міжурадавай беларуска-армянскай камісіі па гандлёва-эканамічным супрацоўніцтве. У ходзе пасяджэння былі разгледжаны пытанні двухбаковага гандлёва-эканамічнага супрацоўніцтва ў такіх галінах, як прамысловасць, сельская гаспадарка, ахова здароўя і фармацэўтыка, інавацыйная дзейнасць, спорт, турызм, а таксама шэраг іншых пытанняў.
Па заканчэнні мерапрыемства для гасцей была праведзена экскурсія па будынку Нацыянальнай бібліятэкі Беларусі, у час якой яны мелі магчымасць пазнаёміцца з архітэктурнымі асаблівасцямі будынка, работай бібліятэкі па абслугоўванні чытачоў, яе інфармацыйнымі рэсурсамі і унікальнай калекцыяй рарытэтных выданняў. У музеі кнігі міністр эканомікі Рэспублікі Арменія Н.Г. Ерыцян пакінуў памятны запіс у кнізе ганаровых гасцей.