10 чэрвеня ў Нацыянальнай бібліятэцы Беларусі пачалося XXIX пасяджэнне Міжурадавага савета па супрацоўніцтве ў будаўнічай дзейнасці краін СНД.
У рабоце Савета бяруць удзел кіраўнікі і дэлегацыі нацыянальных органаў дзяржаўнага кіравання будаўніцтвам краін Садружнасці – Беларусі, Расіі, Украіны, Азербайджана, Казахстана, Арменіі, Таджыкістана, Малдовы; прадстаўнікі ўрада і Нацыянальнага сходу Рэспублікі Беларусь, выканкама СНД і нацыянальных галіновых грамадскіх аб’яднанняў.
Першы дзень работы Савета ўключаў пленарнае пасяджэнне і дыскусіі, падчас якіх былі разгледжаны магчымасці будаўнічай галіны Беларусі па аказанні будпаслуг на тэрыторыі краін СНД і развіццё расійскай сістэмы самарэгулявання ў будаўніцтве. Таксама ўдзельнікі пасяджэння абмеркавалі праблемы рэканструкцыі і мадэрнізацыі буйнапанэльных жылых дамоў і студэнцкіх інтэрнатаў, канцэптуальныя асновы фарміравання нарматыўна-прававой прасторы СНД у сферы тэхнічнага рэгулявання будаўніцтва.
У рамках праграмы пасяджэння ўдзельнікі мерапрыемства азнаёміліся з арганізацыяй працы Нацыянальнай бібліятэкі Беларусі, яе архітэктурай, аб’ёмна-планіровачнымі, інжынернымі і канструкцыйна-тэхналагічнымі рашэннямі будынка бібліятэкі.
Праграма другога дня работы Савета прадугледжвае правядзенне выстаўкі дасягненняў будаўнічых арганізацый Рэспублікі Беларусь у МКСК "Мінск-Арэна"; наведванне дэлегацыямі значных аб’ектаў гістарычнага цэнтра і аб’ектаў новага будаўніцтва г. Мінска; правядзенне прэс-канферэнцыі для СМІ з удзелам кіраўнікоў дэлегацый.
 |
 |
 |
 |
