19 снежня адбыліся музейныя заняткі “Паштоўкі з малюнкамі Уладзіміра Караткевіча”. З дапамогай малюнкаў знакамітага беларускага пісьменніка дзеткі стварылі свае ўнікальныя святочныя паштоўкі. Заняткі адбыліся ў межах праекта “Клуб кніжных прафесараў”.
У музеі кнігі ўдзельнікі паглядзелі выставу “З кніг Уладзіміра Караткевіча”, прымеркаваную да 90-годдзя з дня нараджэння пісьменніка. Дзеткі дазналіся, што Уладзімір Караткевіч меў вялікую бібліятэку і ведаў, дзе стаіць на паліцы кожная кніга. Яшчэ з дзяцінства хлопчыку была закладзена любоў да кнігі, якую ён пранёс праз усё жыццё. Нават у складаным 1942 годзе, калі Уладзіміру Караткевічу было 12 гадоў, ён атрымаў у падарунак ад бацькоў кнігу. У асабістым кнігазборы пісьменніка захоўваліся рукапісы, старадрукі і рэдкія выданні. З трохтысячнага збору каля 500 кніг маюць дароўныя надпісы. Уладзімір Караткевіч клапатліва ставіўся да сваёй бібліятэкі і пазначаў кнігі экслібрысамі. Ён сам ствараў экслібрысы для кніг, часам нават індывідуальныя. А адным з найлепшых падарункаў для пісьменніка былі экслібрысы ад вядомых мастакоў.
Пасля прагляду экспазіцыі дзеткі пераканаліся, што Уладзімір Караткевіч не толькі выдатны пісьменнік і паэт, а таксама мастак! Ён не толькі ствараў экслібрысы для кніг, але і цудоўна маляваў! А для сваіх сяброў сам рабіў віншавальныя паштоўкі. З дапамогай малюнкаў класіка беларускай літаратуры ўдзельнікі заняткаў стварылі свае паштоўкі да свят.
Матэрыял пададзены навукова-даследчым аддзелам кнігазнаўства.
