17 кастрычніка ў бібліятэцы прайшло ўрачыстае мерапрыемства “Спасцігаем мову, спасцігаем краіну”.
Замежныя словы – не проста літары, сімвалы і нязвыклая мелодыка. Вывучаючы мову іншай краіны, мы не толькі пачынаем разумець, аб чым размаўляюць у другім кутку свету, а найперш пазнаём характар, тэмперамент і культуру народа.
Італія… далёкая геаграфічна, аднак сяброўская і блізкая па духу. Мы маем агульную 25-гадовую гісторыю дыпламатычных зносін, якія даўно выйшлі за межы афіцыйных і набылі адценне дружбы і ўзаемападтрымкі. Невыпадкова, 2017-ты абвешчаны Годам італьянскай культуры ў Беларусі, а 16 кастрычніка наша краіна ўжо сямнаццаты раз далучылася да Сусветнага тыдня італьянскай мовы.
Мерапрыемства ўбібліятэцы прайшло пад высокім патранатам прэзідэнта Італьянскай Рэспублікі. Прагучалі прывітальныя словы Надзвычайнага і Паўнамоцнага Пасла Італіі ў Рэспубліцы Беларусь Стэфана Б’янкі, намесніка генеральнага сакратара Таварыства Дантэ Аліг’еры Андрэа Вінчэнцоні і намесніка дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандра Сушы.
Урачыстым момантам сустрэчы стала перадача ў дар Нацыянальнай бібліятэцы факсіміле старажытнага манускрыпта “Боскай камедыі” Дантэ Аліг’еры (Manoscritto Palatino 313), арыгінал якога датуецца другой чвэрцю XIV стагоддзя і захоўваецца ў Нацыянальнай цэнтральнай бібліятэцы Фларэнцыі.
Прыемнай навіной для тых, хто вывучае італьянскую мову, стала прэзентацыя праекта першага італьянска-беларускага слоўніка, які ажыццяўляецца пры падтрымцы Таварыства Дантэ Аліг’еры. Гэта першы падобны праект беларускай італьяністыкі. Аб тым, як ён зараджаўся і на якім зараз этапе, распавялі дырэктар Інстытута мовазнаўства імя Якуба Коласа Нацыянальнай акадэміі навук Беларусі Ігар Капылоў, намеснік дырэктара па навуковай рабоце Сяргей Гаранін і загадчык сектара камп’ютарнай лінгвістыкі Уладзімір Кошчанка.
Пранікнуцца тэмай Італіі госці вечара змаглі падчас знаёмства з кніжнай выстаўкай, якую падрыхтавала Нацыянальная бібліятэка Беларусі. Каля 70 выданняў шматбакова і рознапланава прадставілі Bel Paese − ад гісторыі і культуры да кухні і кіно. Вялікі раздзел быў прысвечаны італьянскай мове. Кнігі па гісторыі мовы, падручнікі, слоўнікі, дапаможнікі і размоўнікі – усё тое, што, безумоўна, спатрэбіцца, калі вы надумаеце вувучаць італьянскую мову. Ці, магчыма, вы ўжо размаўляеце па-італьянску – parlі italiano?
 |
 |
 |
|
|
|
|
 |
 |
 |
 |
 |
 |
