Ці ведаеце вы, калі з’явілася папера? Складана ўявіць, што людзі калісьці жылі без гэтага матэрыялу. Сёння ж толькі азірнешся – усюды бачыш безліч прадметаў з паперы вакол сябе. І перш за ўсё, вядома, кнігі. Яны з’яўляюцца неад’емнай часткай жыцця школьнікаў. Якія яны? Цікавыя, з малюнкамі, рознай вагі і памеру… А яшчэ яны – папяровыя.

На занятках “Папяровыя цуды” дзеці дазналіся:

якія матэрыялы выкарыстоўвалі для стварэння кнігі і дзе была вынайдзена папера;
калі з’явіліся першыя еўрапейскія майстэрні па вырабе паперы і пачаў працаваць першы папяровы млын на тэрыторыі Вялікага Княства Літоўскага;
чаму паперні будавалі каля рэк;
які малюнак мае назву "філігрань" і навошта ён выкарыстоўваўся пры стварэнні паперы.

Хлочпыкі і дзяўчынкі мелі магчымасць пабачыць і параўнаць матэрыялы, якія ў старажытнасці служылі пісцам: гліняныя таблічкі, папірус, пальмавае лісце, бяросту, пергамен і, нарэшце, паперу. Юныя наведвальнікі спрабавалі ўзгадаць, якія прадметы чалавек стварае з паперы сёння і выкарыстоўвае штодзень.

Музей кнігі запрасіў на сустрэчу Аркадзя Міхайлавіча і Тамару Адамаўну Гвоздзевых з Мінска, якія прадэманстравалі, як такі просты матэрыял як папера можна ператварыць у вясёлую дзіцячую цацку. Яны пазнаёмілі дзяцей з цацкамі са свайго дзяцінства і навучылі ствараць іх.

Такім чынам, кожны наведвальнік заняткаў даведаўся, калі з’явілася папера і як яе выраблялі, а таксама зрабіў з яе гістарычную цацку сабе на памяць.