19 мая ў рамках II Міжнароднага лічбавага форуму #GBC (Дзяржава. Бізнес. Грамадзяне) намеснік генеральнага дырэктара ТАА “Беларускія воблачныя тэхналогіі” Міхаіл Дука ўручыў генеральнаму дырэктару Нацыянальнай бібліятэкі Беларусі Аксане Кніжнікавай падзяку за паспяховае супрацоўніцтва пры рэалізацыі праекта па лічбавізацыі культурнай спадчыны Беларусі.
Нацыянальная бібліятэка Беларусі з 2018 года супрацоўнічае з кампаніяй beCloud, якая з’яўляецца першым інфраструктурным аператарам краіны. Пераход на выкарыстанне воблачнай інфраструктуры Рэспубліканскага цэнтра апрацоўкі звестак з’явіўся першым крокам бібліятэкі ў арганізацыі працы яе інфармацыйна-тэхналагічных сістэм “у аблоках”. Сёння рэсурсы платформы выконваюць функцыі рэзервовага цэнтра бібліятэкі ў якасці геаграфічна аддаленай пляцоўкі для захоўвання электроннага кантэнту. У 2020 годзе на рэспубліканскую платформу перанесена работа інфармацыйнай сістэмы рэгіянальных зводных каталогаў бібліятэк Рэспублікі Беларусь. Наступны этап – рэалізацыя праекта па міграцыі даных электронных калекцый электроннай бібліятэкі.
Дзякуем ТАА “Беларускія воблачныя тэхналогіі” за надзейнае партнёрства і спадзяёмся на далейшае паспяховае супрацоўніцтва!
Матэрыял падрыхтаваны аддзелам сувязей з грамадскасцю.
