2 верасня ў бібліятэцы былі падведзены вынікі V Рэспубліканскага конкурсу “Бібліятэка – цэнтр духоўнай асветы і выхавання”.
Для ўдзелу ў конкурсе было заяўлена 62 працы ад публічных бібліятэк Міністэрства культуры Рэспублікі Беларусь, бібліятэк устаноў адукацыі Міністэрства адукацыі Рэспублікі Беларусь і іншых ведамстваў.
У склад кампетэнтнага журы ўвайшлі: епіскап Барысаўскі і Мар’інагорскі Веніямін (старшыня журы), дырэктар Нацыянальнай бібліятэкі Беларусі Р.С. Матульскі (намеснік старшыні журы), намеснік Упаўнаважанага па справах рэлігій і нацыянальнасцей А.І. Радчанка, галоўны спецыяліст упраўлення культуры і народнай творчасці Міністэрства культуры Рэспублікі Беларусь С.У. Бацян, галоўны спецыяліст упраўлення агульнай і сярэдняй адукацыі Міністэрства адукацыі Рэспублікі Беларусь І.У. Булаўкіна, галоўны бібліятэкар навукова-даследчага аддзела бібліятэказнаўства Нацыянальнай бібліятэкі Беларусі В.А. Рынкевіч (сакратар журы), сакратар Выдавецкага савета Беларускай Праваслаўнай Царквы Т.А. Самайлюк, загадчыца Цэнтральнай бібліятэкай Беларускага Экзархата С.Ф. Вінаградава, член Каардынацыйнага савета па бібліятэчнай дзейнасці пры Сінадальным аддзеле рэлігійнай адукацыі і катэхізацыі БПЦ Т.А. Квасова.
У ходзе пасяджэння былі вызначаны пераможцы ў чатырох намінацыях: “Духоўна-маральнае выхаванне дзяцей і моладзі”, “Гісторыя Праваслаўя роднага краю”, “Сям’я – спадчынніца маральных і духоўных каштоўнасцей”, “Патрыятычнае выхаванне на праваслаўных традыцыях”. У выніку было намінавана і вылучана на заахвочванне 39 конкурсных работ.
Пасля зацвярджэння пратакола пасяджэння журы мітрапалітам Мінскім і Заслаўскім Паўлам, Патрыяршым Экзархам усяе Беларусі, інфармацыя пра пераможцаў будзе выстаўлена на партале Нацыянальнай бібліятэкі Беларусі, афіцыйным сайце Сінадальнага аддзела рэлігійнай адукацыі і катэхізацыі БПЦ і сайце “Праваслаўныя бібліятэкі Беларусі”.
Матэрыял прадастаўлены навукова-даследчым аддзелам бібліятэказнаўства.
