11 верасня адбылася сустрэча дэлегацыі спецыялістаў бібліятэкі з мастаком-графікам Сяргеем Анатольевічам Волкавым, у межах якой у фонд бібліятэкі былі перададзены арыгінальныя малюнкі да знакамітых выданняў для дзяцей.
Сустрэча была арганізавана на выставе творчага аб’яднання “Верасень”, якая цяпер адбываецца ў Палацы мастацтваў. “Верасень” быў арганізаваны ў структуры Беларускага саюза мастакоў як творчае аб’яднанне ў 1989 г. і сёлета адзначае сваё трыццацігоддзе. Яго ядром сталі вядомыя майстры кніжнай і станковай графікі, творы якіх адрозніваюцца ўласным стылем і высокай выяўленчай культурай, маюць шматлікія рэспубліканскія і міжнародныя ўзнагароды. За тры дзесяцігоддзі дзейнасці “Верасень” сфармаваў свае выставачныя традыцыі. Заслужаным поспехам карыстаюцца справаздачныя выставы “вераснёўцаў”, якія праводзяцца раз у два гады. З 1989 года ў аб’яднанне ўваходзіць мастак-графік Сяргей Волкаў, які з’яўляўся яго старшынёй у 1989–1992, 1999–2019 гадах.
Сяргей Волкаў – прадстаўнік творчай дынастыі. Яго бацька і дзед – знакамітыя мастакі. Валянцін Віктаравіч – народны мастак Беларусі, аўтар манументальнага гістарычнага палатна “Мінск, 3 ліпеня 1944 года”. Анатоль Волкаў у час вайны працаваў над выданнем “Раздавім фашысцкую гадзіну!”, а самая вядомая яго карціна – “Першага верасня” – у савецкі час аздабляла школьныя падручнікі.
У 2019 годзе Сяргей Волкаў выдаў кнігу “Валянцін Волкаў: класік беларускага савецкага жывапісу”, якую прысвяціў дзеду. Яна была выдадзена ў Рызе накладам усяго 40 экзэмпляраў. Кнігу можна пачытаць у Нацыянальнай бібліятэцы.
Сяргей Анатольевіч ствараў як сатырычныя плакаты, так і графічныя партрэты, шаржы і дзіцячыя ілюстрацыі. Для дзяцей мастак праілюстраваў больш за 300 выданняў, у тым ліку кнігі Янкі Маўра, Эдзі Агняцвет, Івана Муравейкі, Міколы Маляўкі, Міколы Чарняўскага, Паўла Місько, Сяргея Давідовіча, беларускія народныя казкі і байкі. Не адзін дзясятак гадоў яго творчасць была звязана з часопісамі “Вясёлка” і “Вожык”.
Сяргей Волкаў – заслужаны дзеяч мастацтваў БССР (1989), лаўрэат прэміі імя Васіля Віткі (2004), лаўрэат прэміі імя Кандрата Крапівы (2007). Узнагароджаны медалём Францыска Скарыны (2017).
Фонд бібліятэкі ўключае кнігі ад 1959 года выдання, праілюстраваныя мастаком. Сяргей Анатольевіч перадаў у дар бібліятэцы арыгінальныя акварэльныя малюнкі, якія з’яўляюцца ілюстрацыямі да вядомых дзіцячых кніг.
Матэрыял прадастаўлены навукова-даследчым аддзелам кнігазнаўства.