20 студзеня ў рамках рэспубліканскай навагодняй дабрачыннай акцыі “Нашы дзеці” бібліятэку наведалі выхаванцы Андрэеўскага інтэрната Аршанскага раёна Віцебскай вобласці.
Пазнаёміцца з Мінскам і яго славутасцямі, прагуляцца па шырокіх праспектах, убачыць цырк і здзейсніць падарожжа па “алмазу”... Такая насычаная праграма чакала юных гасцей з Андрэеўскага інтэрната, замацаванага за Міністэрствам абароны Рэспублікі Беларусь, падчас наведвання сталіцы.
У Нацыянальнай бібліятэцы для дзяцей прайшла займальная экскурсія па будынку: дзеці пакруцілі гранітны шар, загадаўшы жаданні ля фантана, паскакалі на шкляной падлозе, праверыўшы яе на трываласць, адшукалі родную Віцебскую вобласць на велізарных мастацкіх пано. І нават навучыліся самастойна заказваць літаратуру са сховішча, каб пераканацца – кнігі сапраўды “катаюцца” па бібліятэцы на тэлеліфце.
У музеі кнігі дзяцей вітаў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Суша. Ён расказаў ім аб 500-гадовым юбілеі беларускага кнігадрукавання, які мы маштабна адзначалі ў мінулым годзе, і падараваў кнігі пра вядомага першадрукара Францыска Скарыну. Але гэта, вядома, не ўсе падарункі – Нацыянальная бібліятэка перадала ў дар Андрэеўскаму інтэрнату каля 400 выданняў, сярод якіх развіваючыя кнігі, мастацкая, навукова-папулярная і вучэбная літаратура для дзяцей і падлеткаў.
Прадоўжылася падарожжа знаёмствам з музейнымі экспанатамі: кнігай-малышкай і кнігай-гігантам, кнігай-скруткам і самымі старажытнымі рукапіснымі кнігамі. Апошняй кропкай экскурсійнага маршрута стала аглядная пляцоўка, дзе з вышыні 73 метраў дзеці змаглі ўбачыць Мінск, як на далоні.
Спадзяемся, што гэта захапляльнае падарожжа па Нацыянальнай бібліятэцы пакінула прыемныя ўспаміны ў дзяцей, і кожны з іх абавязкова вернецца сюды зноў, каб дакрануцца да скарбніцы ведаў.